Саулай Россейде тирлик жыйыу кезиу къалай озуп баргъаныны юсюнден РФ-ни Правительствосуну Председателини орунбасары Дмитрий Патрушевни башчылыгъында бу кюнледе ётген кенгешде сёлешиннгенди. Аны ишине КъМР-ни эл мюлк министри Хасан Сижажев да къатышханды, деп билдиргендиле министерствону пресс-службасындан.
«Шёндю мирзеу ёсдюрюу бла кюрешген регионланы барында да иш тири барады. Озгъан ыйыкъда окъуна биз 100 миллион тоннадан атлап, бюгюнлюкде 105 миллион тоннагъа жетдиргенбиз. Тирликлилик да ёсгенди, былтыргъы кёрюмдюден уллуду. Алай бла белгиленнген умут – 135 миллион тонна – тюрленмегенди, биз тирлик аллай бир болурун сакълайбыз», - дегенди Дмитрий Патрушев.
Болсада регионла, Россейни Эл мюлк министерствосу да алагъа къошулуп, болумну дайым къарауда тутаргъа эмда эл мюлк товарла чыгъарыучулагъа къырал берген болушлукъну жетдирип турургъа керекдиле, дегенди ол.
Башха регионладача, Къабарты-Малкъарда да тирлик жыйыу кезиу энтта да бошалмагъанды, тап барады. Аны къой, нартюхню оруу окъуна энди башланырыкъды, чёплеуню заманы да жууукъ кезиуде жетерикди. Тюрлю-тюрлю тахта кёгетлени, картофну, жемишлени жыйыу а энтта да барады. Эллиле бу ишни бардыргъан кезиуде келир жаз башына хазырланыргъа кереклисин да унутмай, тийишли мадар этедиле.
Кенгешни ахырында Правительствону Председателини орунбасары тирлик мындан ары да заманындан кеч къалмай, къоранчсыз жыйылыргъа кереклисин чертгенди. Алай болур ючюн а, элеваторланы, мирзеу жыйгъан жерлени да тап халда тутаргъа тийишлиди, дегенди.

Улбашланы Мурат.