Тюнене республикада белгили къырал эм жамауат къуллукъчу Владимир Соховну эсгере, мемориал къанганы ачылыуу ётгенди. Алайда Владимир Казбулатович бла кёп жылланы шуёхлукъ жюрютюп тургъанла, жууукъ-ахлулары да жыйылгъандыла. Ол санда КъМР-ни Парламентини председатели Татьяна Егорова, КъМР-де Адамланы эркинликлери жаны бла уполномоченный Зумакъулланы Борис, Нальчикни администрациясыны таматасы Таймураз Ахохов эм башхала.
Владимир Сохов шахарны толтуруучу комитетине башчылыкъ этген кезиуде кёп объект ишленнгенин жыйылыуда энчи белгилегендиле. Басманы юйю, Пионерлени юйю, Республикалы телевиденияны мекямы аны кезиуюнде берилген эдиле хайырланыргъа. Дагъыда адамланы тозурагъан юйледен жангы фатарлагъа кёчюрюу да аны заманында къыстау тамамланнган жумуш эди.
Жыйылыуну ача, Зумакъулланы Борис Владимир Казбулатовични юсюнден аны 85-жыллыкъ юбилейине аталгъан китап да басмадан чыкъгъанын, аны ал сёзюн регионну Башчысы Казбек Коков жазгъанын айтханды.
- Бизни тенгибизни аты ёсюп келген тёлюню эсинде сакъланырыгъы къууандырады. Бу халлы къангаланы ала жашагъан юйледе орнатыу керек жумушду, - деп чертгенди Борис Мустафаевич.
Нальчикни мэри Таймураз Ахохов а аны кезиуюнде шахарда къурулуш ишле бла бирге жолла, жылыу берген ызла да аслам жангыртылгъанларын, къалгъан инфраструктура да, кеси заманына кёре, уллу шахарладан артха къалмай айныгъанын белгилегенди.
- Владимир Казбулатович, атам бла шуёхлукъ жюрютгени себепли, мен жаш заманда юйюбюзде кёп кере бола тургъанды. Кесини сынамындан юлюш чыгъара, насийхат сёзлени къызгъанмагъанды, - дегенди.
Соховланы тукъумларыны атындан бу огъурлу ишни къурагъанлагъа ыразылыгъын билдире уа, Терк районну Урожайное элини администрациясыны таматасы Анзор Сохов сёлешгенди.
- Быллай адамыбызны сыйын кёрюп, этген ишине бийик багъа бичгенигиз ючюн тукъумубузну атындан ыразылыгъымы билдиреме, - дегенди ол.
Мемориал къанганы уа Зумакъулланы Борис бла Владимир Казбулатовични къарындашындан туугъан Аслан Карачаевич ачхандыла.
Эсигизге салайыкъ, Владимир Сохов Нальчик шахарны толтуруучу комитетини башчысы, КъМР-ни премьер-министрини орунбасары, РФ-ни Къырал Думасыны экинчи эм ючюнчю чакъырылыуларыны депутаты болуп тургъанды. Дуниясын 2023 жылда алышханды.
Таппасханланы Аминат.
