Быйыл РФ-де МЧС къуралгъанлы 35 жыл толады. Бу юбилейге жоралап, Элбрус бийик-тау излеу-къутхарыу къауумну къутхарыучулары Минги тауну тёппесине ведомствону байрагъын чыгъаргъандыла.
Жашла тау тёппеге тебирегенде, кюнню халы алай осал тюйюл эди. Алай жумушну ахырына жетдирирге алагъа табийгъат болумла чырмаулукъ этерге аздан къойгъандыла. Къаты жел, туман, хауада кислородну азлыгъы алагъа тикге барыргъа онг бермеселе да, жашла боюнларына алгъан борчларын толтургъандыла. 
Россейни МЧС-и къачан да, бютюнда бюгюнлюкде, къыйын болумгъа тюшген адам жарсыуу бла кеси къалмазлыгъыны белгисиди. Бизни къутхарыучуланы усталыкълары бла хазырлыкълары сау дуниягъа да айтылгъанды. 
- Быйыл биз министерствону юбилейин белгилейбиз. Аны бла байламлы жашла ведомстволу байракъны Европаны бек бийик тау тёппесине чыгъаргъандыла. Ёсюп келген тёлюге быллай жумушла ахшы юлгюдюле, ала да, бизни жашлача, жигитле болурла деп ышанама, - деп чертгенди РФ-ни МЧС-ини КъМР-де Баш управлениясыны таматасы Михаил Надежин. 

къасымланы Аминат.