«Multi European Games 2025» фIэщыгъэр зэрихьэу шыщхьэуIум и 28 - 31-хэм Сербием и Ниш къалэм щекIуэкIащ тхэквондомкIэ (ВТФ, Олимп джэгухэм хыхьэ лIэужьыгъуэмкIэ) рейтинг баллхэр щат дунейпсо зэхьэзэхуэ. Абы щызэпеуащ къэрал 35-м щыщ щIалэрэ хъыджэбзу 2000-м нэблагъэ. 
Урысей Федерацэм и командэ къыхэхам хэту зэхьэзэхуэм щыIащ Къэбэрдей-Балъкъэрым и «Пять колец» спорт академием и гъэсэни 6. Ар и щыхьэтщ республикэм тхэквондом иужьрей илъэсхэм зыужьыныгъэфIхэр зэрыщигъуэтамрэ тхэквондистхэм я зэфIэкIхэр утыкушхуэхэм къыщалъытэ зэрыхъуамрэ. 
Ди гуапэу къыхэдгъэщынщи, ди псалъэхэм я щыхьэту, иджырей зэхьэзэхуэми ди лъахэгъухэм екIурэ-ещхьу зыкъыщагъэлъэгъуащ. Я хьэлъагъхэмрэ, ныбжьхэмрэ елъытауэ зыхэта гупхэм дыщэ медалхэр къыщахьащ Бекъул Миланэ, Багъ Идар, Iусен Руслан сымэ. Къып Эмилие, Бакъей Миленэ, Абазэ Амир сымэ ещанэ хъуахэщ.
Ди спортсменхэр зэхьэзэхуэм хуагъэхьэзыращ УФ-м щIыхь зиIэ и тренер Ахъмэт Амир, Уэзрокъуэ Анзор, Унэжокъуэ Абдельджэбар сымэ. 
ЗэIущIэм щытекIуахэр хэтынущ Европэм тхэквондомкIэ пашэныгъэр къыщыхьыным хуэунэтIауэ мы гъэм Алыджым щызэхэтыну зэпеуэм.

ХЬЭЩЫКЪУЕЙ Олег.