«Си хьэрычэт IэнатIэ» центрхэм я лэжьыгъэр къызэгъэпэщыным, жыпIэнурамэ, я щхьэ хуэлэ­жьэжыну зезыгъэтхахэм я IэнатIэ къызэIуахын, ар тэмэму зэтраухуэн щхьэкIэ зыхуэныкъуэну дэфтэрхэр «зы щхьэгъубжэм» деж щызэфIагъэкIыфын ­папщIэ, Къэбэрдей-Балъкъэрым иджыри сом мел­уан 21-м щIигъу мы гъэм къыхуаутIыпщынущ. 

Къэрал бюджетым къыхэкIыну ахъшэр щIыналъэхэм ятегуэшэным ехьэлIа унафэм иджыблагъэ Iэ щIидзащ УФ-м и Правительствэм и УнафэщI Мишустин Михаил. 
Апхуэдэ Iуэху бгъэдыхьэкIэм и фIыгъэкIэ, хьэрычэт IэнатIэхэр къызэIуахыну жэрдэм зыщIахэм, псом хуэмыдэу, дзэ Iуэху хэхам и ветеранхэм, IэмалыщIэхэр яритынущ лъэпощхьэпо куэд хэмыту бизнесым хыхьэну. Абы къыдэкIуэуи, СВО-м щыIахэм ядэIэпыкъуным ехьэлIауэ лажьэ программэхэми захуегъэубгъунущ.
Лэжьыгъэр ирагъэкIуэкI «Зэхьэзэхуэр зи лъабжьэ экономикэ лъэщ» лъэпкъ пэхуэщIэм хыхьэ «Хьэрычэт IэнатIэ мащIэмрэ курытымрэ» къэрал пэхуэщIэм ипкъ иткIэ. 
ХЬЭЩОКЪУЭ  Алыдж.