Налшык къалэм Щэнхабзэ зыужьы­ны­гъэм­­кIэ и центрым щекIуэкIащ «ХъуэпсапIэхэм я хъыринэ» концертыр. 
Гъэ еджэгъуэщIэм ипэ къихуэу къызэрагъэ­пэща концертыр ягъэдэхащ центрым и «Гармония» уэрэджыIакIуэ студием и гъэсэнхэм, «Каллисто» театрым и къэфакIуэхэм, «Голос» теленэтыным хэта Къущхьэ Миланэ. Артист ныбжьыщIэхэм ягъэзэщIащ сабий хэкупсэ уэрэдхэр. 
Щэнхабзэ зыужьыныгъэмкIэ центрым и унафэщIым и къуэдзэ, «Гармония» уэрэ­джы­IакIуэ студием и унафэщI Мэзыхьэ Анастасие зэ­рыжиIамкIэ, Налшык къалэм щыпсэу ныб­жьы­щIэхэми балигъхэми гъэ еджэгъуэ­щIэм пащэнущ сурэт щIынымкIэ, къафэмкIэ, уэрэд жыIэнымкIэ, художественнэ гимнастикэмкIэ къыщызэрагъэпэща гупжьейхэмрэ клубхэмрэ я лэжьыгъэм. 
- Зэманым къигъэув щIэхэм зэрызыдедгъэ­кIу­ным иужь диту, сабийхэмрэ щIалэгъуалэм­рэ я зэфIэкIхэр къызэкъуахыным, абыхэм зегъэужьыным хуэгъэпса гупжьейхэр гъэ еджэгъуэщIэм нэхъыбэ тщIыну ди мурадщ, - жиIащ Мэзыхьэм. – Ди центрым иджы фыщедэIуэну Iэ­мал фиIэщ блоггингым, жьакIуэу псэлъэ­ным, актёр Iэзагъэм, утыку итыкIэм теухуа дерсхэм. КъинэмыщIауэ, мы гъэм щIэныгъэ гуэдзэу идогъажьэ «Код 5642» продюсер центрыр. Ар артист ныбжьыщIэхэм яхуэщхьэпэнущ я репертуар къыщызэрагъэпэщыжкIэ. «Звук-М» музыкэ издательствэм и лэжьакIуэ Къанэмэт Индирэ щIалэгъуалэм ядэIэпыкъуну зэримурадым и фIыгъэкIэ, гупыж зыщIхэм я уэрэдхэр а IуэхущIапIэм щрагъэтхыну Iэмал яIэнущ. Мы IуэхущIапIэр сэбэп мэхъу ди гъэ­сэн­хэм сабий уэрэдхэр къалэм щрагъэкIуэкI щэнхабзэ зэхыхьэхэм щагъэзэщIэнымкIи. 
Пшыхьыр къызэрагъэпэщынымкIэ дэIэпыкъуэгъу хъуащ волонтёрхэр. Концерт нэужьым ныбжьыщIэхэм папщIэ мастер-классхэр ирагъэкIуэкIащ. Хабзэ зэрыхъуауэ, «Солнышко» журналым и лэжьакIуэхэм сабийхэр саугъэтхэмкIэ ягъэгуфIащ. 
Тхыгъэхэри сурэтхэри 
ТЕКIУЖЬ Заретэ ейщ.