Бу кюнледе Битеуроссей Халкъ фронтну республикада бёлюмюню келечилери Жол управленияны специалистлери бла бирге «Жашауну ырахат этерча инфраструктура» миллет проектге кёре тынгылы ремонт ишле бардырылгъан эки объектни жокълагъандыла, деп билдиредиле КъМР-ни Транспорт эмда жол мюлк министерствосуну пресс-службасындан.
Аны чеклеринде ОНФ-ни келечиси Изабелла Косумова объектлеге башчылыкъ этгенле бла бирге Малка бла Сармаково эллени араларында «Малка – Ингушли» жолда 8 километр участкада ишле къалай баргъанларына къарагъандыла. Бюгюнлюкде мында жолну мурдорун, жанларын кючлеп бошап, тротуарланы жангыртып, жорукъланы билдирген белгиле салып, ызла эм темир буруула тартып кюрешедиле.
Андан сора да, сагъынылгъан миллет проектге кёре, Каменкагъа баргъан жолгъа да тынгылы ремонт этиле турады. Ишлени кезиуюнде аны 1,8 километр чакълы бири жангыртыллыкъды. Бусагъатда подряд организацияны келечилери жолну мурдорун кючлеп бошап, биринчи къат асфальт салырча жумушланы тамамлайдыла. Аны бла бирге жанында тротуар да ишленеди. Дагъыда кече жарыкъ болурча чыракълы чыпынла да тартыллыкъдыла. Къоркъуусузлукъгъа да аслам эс буруллукъду. Ол санда жорукъну билдирген белгиле салынырыкъдыла эм темир ызла бла буруула да тартыллыкъдыла.
Жангыртылгъан жол элни ара орамында Революционная орамда транспорт ауурлукъну азайтыргъа, машинала бир бирлерин эм жаяу жюрюгенлени да чырмамазча этерге эм бу тийреде жашагъанланы болумларын игилендирирге болушурукъду.
- Биз КъМР-ни Транспорт эмда жол мюлк министерствону эм Жол управлениясыны келечилери бла бирге объектледе игилендириу жаны бла ишле болжалдан кеч къалмай тамамланырларына эм иги материалла хайырланылырларына дайым кёз-къулакъ болгъанлай турабыз. Ол санда тийишли эсгертиуле да беребиз,- дейди ОНФ-ни бёлюмюню келечиси Изабелла Косумова.
Эсге сала айтсакъ, жолла бла байламлы кемчиликлени юсюнден Транспорт эмда жол мюлк министерствогъа билдирилсе, аланы кетерирча терк окъуна мадар этиледи. Ол себепден ОНФ-ни келечилери жангыртыу ишле баргъан неда бошалгъан объектледе болум бла шагъырейленирге ведомствону специалистлери бла бирге терк-терк чыгъадыла. Бир тюрлю кемчилик эсленсе, ол къысха заманда кетерилирге кереклиси эсгертиледи.
Магометланы Сулейман.
