КъБР-м и Парламентым и бжьыхьэ лэжьэгъуэм и япэ зэIущIэр екIуэкIащ. Ар къы­щы­зэIуихым, республикэм и хабзэубзыху IуэхущIапIэм и УнафэщI Егоровэ Татьянэ теп­сэ­лъыхьащ зэман гъунэгъум къалэн нэхъыщхьэу къапэщытхэм. 

Абы къыхигъэщащ бжьыхьэ лэжьэгъуэр Iуэху­гъуэ куэдкIэ гъэнщIауэ зэрыщытынур, «стIол хъурейхэр», «Правительствэм хухах сы­хьэтхэр», едэIуэныгъэхэр, Парламентым и зэ­IущIэхэр къызэрызэщIрагъэубыдэнур. 
Депутатхэм зи чэзу зэIущIэр фокIадэм и 11-м екIуэкIыну траухуащ. Ахэр хэплъащ «Къэбэрдей-Балъкъэрымрэ Ингуш Республикэмрэ ­сату-экономикэ, щIэныгъэ-техникэ, щэнхабзэ Iуэху­хэмкIэ зэрызэдэлэжьэнум теухуа зэгу­ры­Iуэныгъэм и IуэхукIэ» КъБР-м и законым и проектым. 
КъБР-м и Парламентым Экономикэ политикэмкIэ, зыужьыныгъэмрэ хьэрычэт IуэхумкIэ и комитетым и унафэщI Iэпщэ Заур зэрыжиIамкIэ, зэгурыIуэныгъэмкIэ я мурадщ лъэныкъуитIыр Iуэхугъуэ зэмылIэужьы­гъуэ­хэмкIэ зэрызэ­дэлажьэм пащэну, экономикэ, хабзэр убзыху­ным ехьэлIауэ яIэ зэпыщIэныгъэхэр ирагъэ­фIэкIуэну. 
ЗэIущIэм щытепсэлъыхьащ «ЩIыр къэзыу­хъуреихь хьэуар хъумэным епхауэ» республи­-кэ законым зэхъуэкIыныгъэхэр хэлъхьэным и IуэхукIэ» щIыналъэ законым и проектым. 
КъБР-м и Парламентым Мэкъумэш Iэна­тIэмкIэ, щIыуэпсыр къэгъэсэбэпынымкIэ, экологиемрэ дыкъэзыухъуреихь дунеймкIэ и ко­митетым и унафэщI ТекIушэ Артур жиIащ хьэ­уар зыуфIейр нэхъ мащIэ щIыныр зи къалэн IуэхущIапIэхэмрэ хьэрычэтыщIэхэмрэ ящIапхъэр гъэткIиин зэрыхуейр. Абы теухуа законопроектыр Iэрагъэхьащ зи гугъу ящI лэжьыгъэр зи нэIэм щIэт IуэхущIапIэхэм хэплъэну. 
Депутатхэр тепсэлъыхьащ УФ-м и щIыналъэхэм я жэрдэм зэхуэмыдэхэм. Ахэр теухуат УФ-м и Мэз кодексым, къэрал юридическэ ­бюром и лэжьыгъэр къызэгъэпэщыным текIуа­дэ мылъкур федеральнэ бюджетым къызэ­ры­хэ­гъэкIыпхъэм, нэгъуэщIхэми. 
ЗэIущIэм щагъэбелджылащ егъэджэныгъэм, физическэ щэнхабзэмрэ спортымрэ, жур­налистикэм зегъэужьыным хэлъхьэныгъэ хуэзыщIхэм ящыщу КъБР-м и Парламентым и ЩIыхь тхылъ зратынухэр.