ФокIадэм и япэ махуэхэм ди щIыналъэм щаIэт хабзэ Iуэхугъуэхэм ятещIыхьа гуфIэ­гъуэ зэхыхьэхэр щекIуэкIащ республикэм и еджапIэ нэхъыщхьэхэми абы­хэм епха кол­леджхэми. Апхуэдэу ­Бэрбэч ХьэтIутIэ и цIэр зезыхьэ Къэ­бэрдей-Балъкъэр къэрал университетым, КIуэкIуэ Валерэ и цIэр зезыхьэ Къэбэрдей-Балъкъэр къэрал мэкъумэш ­университетым я бжэIупэхэм щекIуэкIащ егъэджакIуэхэр, студентхэр зыхэта пэ­кIу­хэр, ЩIэныгъэхэм, КъБР-м и Къэралы­гъуэм я ­махуэхэр щагъэлъапIэу. 

КъБКъУ-м и езанэ курсым щIэтIысхьахэр ­фокIадэм и 2-м щызэхуэсат еджапIэм и щIы­хьэпIэ нэхъыщхьэм деж. ГъащIэм хуаIэ мурадхэм ящыщу еджапIэ нэхъыщхьэм щIэтIыс­хьэныр къызэхъулIа щIалэгъуалэм я нэгум ­гукъыдэжыр къищырт, дэрэжэ­гъуэшхуи я псэм зэрызыхищIэр нэры­лъагъут. Мы гъэм ап­хуэ­дэхэм я бжыгъэр цIыху мини 5-м нызэрохъэс. Iэгуауэ инкIэ ахэр IущIащ университетым и ректорым и къалэнхэр зыгъэзащIэ Алътуд Юрэ, еджапIэ нэхъыщхьэм хыхьэ институтхэм, кол­леджхэм, къудамэхэм я пашэхэм. ГуфIэ­гъуэ зэхыхьэр яублащ Урысей Федерацэм и Къэрал Гимныр къегъэуэнымкIэ. Ар гукIи псэкIи да­Iыгъыу ягъэзэщIащ зэхуэсым ­къекIуэлIахэм я нэхъыбапIэм. 
АдэкIэ псэлъапIэр хуит хуащIащ ­КъБКъУ-м унафэщIым. 
- ПщIэ зыхуэсщI си лэжьэгъухэ! ЩIэ­ныгъэ ­зэгъуэтыным зи нэ къыхуикIыу уни­верситетым и езанэ курсым къыщIэтIыс­-хьа щIалэгъуалэ! Сигуми си псэми къабгъэдэкIыу сыныво­хъуэхъу фокIадэм и махуэшхуэхэмкIэ: ЩIэныгъэхэм я махуэмкIэ, ди республикэм и Къэралыгъуэм и махуэмкIэ, - жиIащ Алътудым. - Псом япэрауэ, си гуапэщ лъэхъэнэщIэм фы­хуэузыншэну, абы хувиIэ мурадхэмрэ хъуэ­п­сапIэхэмрэ къывэхъулIэну. КъБКъУ-р ­гъуэгуанэ кIыхь, купщIафIэ къэзыкIуа еджапIэ нэхъыщ­хьэщ. Абы къыщIэкIащ дунейпсо цIэ­ры­Iуагъ зыгъуэта еджагъэшхуэхэр, щIэныгъэлIхэр, къэхутакIуэхэр, IэщIагъэлI нэсхэр. Фэри, зи щIалэгъуэхэ, еджапIэ нэхъыщ­хьэм щIэныгъэ куу, зэфIэкI лъагэхэр щы­зэвгъэ­гъуэтынущ, дауи, Абы къыдэкIуэу ди деж фы­зэрыщеджэну илъэсхэм къэвгъуэ­тынущ ныбжьэгъу пэжхэр, фесэнущ лэ­жьыгъэ зэмы­лIэужьыгъуэхэр фи щхьэ закъуэуи гупым фы­хэтуи вгъэзащIэу. А Iуэхугъэхэм ящыщ дэт­хэнэми мыхьэнэшхуэ зэриIэр зэманым ­къигъэлъагъуэурэ екIуэ­кIынущ, фи фIэщ фщIы. Сынывохъуэхъу еджэным щызыIэрывгъэхьэ ехъулIэныгъэхэм ящыщ дэтхэнэри щIэ­ныгъэ нэхум фыхуэзышэ гъуазэ вхуэхъуну. Фэращ, фи щIэныгъэмрэ зэхэщIыкIымрэщ ди къэ­кIуэнур дахэ зэрыхъунум я джэлэс нэхъыщхьэр. Студент гъащIэр гукъинэу, куп­щIа­фIэу, Iуэхугъэ зэмылIэужьыгъуэ куэдкIэ гъэн­щIауэ ефхьэкIыну, фIыкIэ дызы­щыгугъ щIалэгъуалэ. Гъуэгу махуэ фы­теувауэ къыщIэкIыну!
«Уи кIуэгъуэщ» урысейпсо студент про­ектыр ди щIыналъэм щызыгъэкIуатэ Щокъуий Ларисэ езанэ курсым щIэтIысхьа ­студентхэр къыхуриджащ университетым  и гъащIэми езыр зи пашэ пэхуэщIэми жыджэру хэтыну. Сту­дент илъэсхэр цIыхум куэд къыщищIэ, лъэ­ныкъуэ зэмылIэужьыгъэхэмкIэ зэрызиужь ­лъэхъэнэу зэры­щыт­ри къыхигъэщащ. 
Махуэшхуэ зэхуэсым кърихьэлIахэм захуигъэзащ а еджапIэ нэхъыщхьэр мы гъэм ехъу­лIэныгъэкIэ къэзыуха, Москва ще­кIуэкIа Урысейпсо студент къызэрыщIагъэкI пшыхьым хэта Журтыбей Дианэ. 
- Си гуапэу сынывохъуэхъу фIыуэ тлъагъу ди университетым и студент фызэры­хъуамкIэ. Жы­джэрагъ, гушхуэныгъэ фхэ­лъу, гугъуехь­хэмрэ лъэпощхьэпохэмрэ ­факъыпимыкIуэту щIэныгъэфI зэрызэвгъэгъуэтыным фыхущIэкъуну фыкъыхузоджэ, - жиIащ абы. - Илъэс­хэр блэкIынурэ, фэри, дэ тхуэдэу, къыфщыхъунущ уни­верситетыр фи етIуанэ унэу, абы ныб­жьэгъу щыфхуэхъуахэри фи къуэшу, шыпхъуу къэфлъытэнущ. 
ГуфIэгъуэ зэIущIэм и кIэухыу езанэ курсым щIэтIысхьахэм фIыщIэ хуащIащ ап­хуэдэ гъуэгу махуэ псалъэ дахэ къажезы­Iахэм. Абыхэм нэхъыжьхэр ягъэгугъащ ерыщагъ хэлъу щIэ­ныгъэ зэгъэгъуэтыным елIэлIэну. 
Зэхуэсыр ягъэдэхащ КъБКъУ-м и «Къа­фэ» лъэпкъ ансамблымрэ творческэ щIа­лэгъуа­лэмрэ ягъэзэщIа къафэхэмрэ уэ­рэдхэмрэ. ­ГуфIэгъуэр зэхуащIыжащ студент зэкъуэты­ныгъэм и нэщэнэу къалъытэ КъБКъУ-м и ГимнымкIэ. Ар къызэхуэсахэм зэгъусэу ягъэ­зэщIащ. 
КъБКъМУ-м къыщызэрагъэпэща ап­хуэдэ ­гуфIэгъуэм зыкърахьэлIащ абы щы­лажьэ Iэ­щIагъэлIхэмрэ щеджэ студентхэмрэ нэмыщI, абыхэм я адэ-анэхэми. КъБКъМУ-м щIэныгъэ-къэхутэныгъэ лэ­жьыгъэмкIэ и проректор Бер Джулъеттэ зи пашэ егъэджакIуэхэр яхуэзащ езанэ курсым щIэтIысхьа студентхэм. Берыр и щхьэми университетым и ректорым и къалэн­-хэр зыгъэзащIэ Щхьэгъэпсо Заурбии къабгъэдэкIыу гуапэу ехъуэхъуащ щIэныгъэм и ­гъуэгум теувагъащIэ щIалэгъуалэм. 
- Ди мэкъумэш университетым ще­джэ­хэм, абы и езанэ курсым къыщIэтIысхьа щIалэ­гъуалэм сохъуэхъу къыхаха IэщIагъэмкIэ щIэ­ныгъэ куу зрагъэгъуэтыну, студент илъэсхэр щызу, Iуэхугъуэ хьэлэмэтхэмкIэ гъэнщIауэ ­ирахьэкIыну. Универси­тетым и егъэджакIуэхэм ялъэкI псори ящIэнущ, фэ щIэныгъэ куу зэвгъэгъуэтын пап­щIэ. Абы щхьэкIэ еджапIэ нэхъыщхьэр къызэгъэпэщащ зыхуэныкъуэ псомкIи: ­техникэ лъэщхэмкIи, технологие пэрыт­хэмкIи, IэщIагъэлI IэзэхэмкIи, - къыхигъэщащ абы. - Студентхэм IэмалыфIхэр яIэщ зрагъэ­гъуэт теорие щIэныгъэр практикэ IуэхущIапIэ­хэм щыщIагъэбыдэжыну. Ап­хуэдэ щIыкIэкIэ дызэпха IуэхущIапIэхэм я бжыгъэр 200-м нызэрохьэс. КъинэмыщIауэ, еджэным къыщы­дэхуэ зэманым ди студентхэр жыджэру хэтщ университетым, республикэм щекIуэкI жыла­гъуэ гъащIэм. Ди щIалэгъуалэм ящыщ куэд ­дахьэх спортым, гъуазджэм, щэнхабзэм. 
Мэкъумэш университетым и езанэ курсым и студентхэм зыщрагъэплъыхьащ еджапIэм и унэхэм. Абыхэм папщIэ къы­зэрагъэпэща ­гуфIэгъуэ концертышхуэр куэдым ягу ирихьащ. Зэхуэсым и кIэухыу абы хэтахэм зытрагъэхащ фэеплъ сурэтхэр. 
 Апхуэдэу гукъинэу, Iэтауэ ди щIыналъэм и адрей еджапIэ нэхъыщхьэхэми щагъэ­лъэпIащ ЩIэныгъэхэм, КъБР-м и Къэралыгъуэм я махуэхэр. ЕкIуу, дахэу яублэжа 2025 - 2026 гъэ еджэгъуэщIэр псоми угъурлы яхуэхъуну ди ­гуапэщ. 
ЖЫЛАСЭ  Маритэ.