Къабарты-Малкъар къырал аграр университетни механизация эмда предприятияланы энергия бла жалчытыу бёлюмюнде, РФ-ни Эл мюлк министерствосуну сурамы бла, былтырдан бери эки илму-излем иш тамамланнганды.

Вуздан билдиргенлерине кёре, биринчиси тик жерледе топуракъны битимлилигин игилендириу жаны бла технологияланы эмда техника амалланы жарашдырыу, экинчиси уа аллай жерледе битген жемиш тереклеге къарау бла байламлыдыла.

Биринчи ишни тамамлагъан кезиуде университетни келечилери топуракъны тырнап жарашдыргъан зат къурагъандыла. Аны хайырындан жерни мылылыгъы ючден бирине кётюрюлгенди, тереклени тирликлилиги уа он процентге кёбейгенди.

Экинчи проектни чеклеринде терек бахчалагъа дарман салгъан эмда заранлы битимлени къурутхан затланы чачхан техника жарашдырылгъанды. Вузну адамлары аны ишде сынап кёргендиле, къыйматлы болгъанын тохташдыргъандыла. Айтханларына кёре, ол бир сагъатны ичинде юч гектар тийреде быллай жумушланы тынгылы тындырып чыгъаргъа себеплик этерикди.

Омарланы Мурат хазырлагъанды.