Дызэрыт илъэсым и гъэмахуэ мазищым къриубыдэу ­«Iуащхьэмахуэ» курортым щыIащ цIыху мин 225-м щIигъу. Мы гъэм лэжьэн щIэзыдза, Осетие Ищхъэрэ - Аланием и «Ма­мисон» курортым а пIалъэм ирихьэлIэу турист мин 19-м зы­щагъэпсэхуащ, къитащ иджыблагъэ Кавказ.РФ-м и пресс-IуэхущIапIэм. 

Апхуэдэуи абы къыхегъэщ Тырныауз къалэм гъэмахуэм къыщеха ятIэпсым и зэранкIэ Iуащхьэмахуэ лъапэ дэмыкIыфу турист куэд къызэрынар. Кавказ.РФ-м и унафэщI Юмшанов Андрей зэрыжиIамкIэ, «Iуащхьэмахуэ» курортым лыжэхэмкIэ къыщажыхьащ мы гъэм бадзэуэгъуэм и 6 пщIондэ. Туристхэм Iэмал яIащ псори зэхэту махуэ 224-кIэ джабэм кIэрытыну. Апхуэдэ япэм щыIакъым. 

«Мы гъэм къурш задэхэм дэкIа альпинистхэм я бжыгъэр мини 10-м щIигъуащ. Гуп-гупкIэ къакIуэ школакIуэхэм я бжыгъэми ­хуэди 2,6-кIэ хэхъуащ. Къэралым и щIыналъэ куэдым къикIа ­сабийхэр мин бжыгъэкIэ Iуащхьэмахуэ лъапэ щыIащ гъэмахуэм», - къыхигъэщащ Юмшановым.
Мы гъэ гъэмахуэм ирихьэлIэу «Iуащхьэмахуэ» курортым къыщызэIуахащ «ТекIуэныгъэм и лъагъуэ», «105-нэ пикет» эко­лъагъуэхэр.
Фигу къэдгъэкIыжынщи, 2024-2025 гъэм и щIымахуэ лъэхъэнэм Iуащхьэмахуэ лъапэ зыщагъэпсэхуащ цIыху мин 335-м. ЛыжэкIэ джабэ нэкIухэм къыщажыхьащ мэкъуауэгъуэм и 17 пщIондэ. 
 

КЪУЭЖЕЙ Iэмин.