Тюнене Кенжеде «Вымпел» жангы спорт-жарау этиу араны ачылыуу болгъанды. Ол къууанчлы ишге КъМР-ни Башчысы Казбек Коков бла бирге РФ-ни Къырал Думасыны депутаты Геккиланы Заур, сенатор Улбашланы Мухарбий, КъМР-ни Правительствосуну Председатели Мусукланы Алий, КъМР-ни спорт министри Ислам Хасанов эм башхала къатышхандыла.
Жангы комплексде 400 квадрат метрлик 3 уллу зал бардыла: тренажёр зал, тутушууну залы эм гимнастиканы залы. Спорт гимнастикагъа, сёз ючюн, 200 сабий жюрюйдюле. 1 июньдан бери мында дагъыда самбодан, дзюдодан, тхэквондодан эмда каратеден жарау этиу жыйылыула бардырылгъандыла. Дагъыда бу арада спортчула тынгылы медицина болушлукъ да табарыкъдыла. Алты къатлы мекямны къонакъ юйю да барды.
- Спорт комплексни эшиклери аллай бир жаш спортчугъа ачыкъ болгъанлары барыбызны да къууандырады. Ала кеслерини жетишимлери бла биз ёхтемленирча этериклерине ишексизме, - деп чертгенди Казбек Коков, мекямны босагъасындан атлай.
Къонакъла, алагъа тюбеген жаш спортчула бла къысха ушакъ бардырып, мекямны ич кёрюмдюсю бла шагъырейленнгендиле. Бек алгъа уа Казбек Валерьевич бу араны къурулушуна къыйын салгъанлагъа жюрек ыразылыгъын билдиргенди.
- Бизде къачан да бизнес бла кюрешген жашла республиканы айныууна къыйын салыргъа угъай демейдиле. Бу анга ахшы юлгюдю. Бюгюн мен энчи Альберт Каздоховха ыразылыгъымы билдирирге сюеме. Ол не заманда да быллай башламчылыкълагъа къатыша келеди. Сабийле бизни тамблагъы кюнюбюз болгъанын Альберт Билялович бир заманда да унутмайды. Мында жарау этгенлени, кесими да атымдан дагъыда комплексни таматасы Амир Ахметовха ыразылыгъымы билдиреме. Ол кёп жылланы тренер болуп да ишлегенди. Сабийле ючюн бир атлам этген хар инсан да уллу махтаулукъгъа тийишлиди, - дегенди регионну Башчысы.
Ызы бла Россейни гимни согъулгъанды эм жаш спортчула къонакълагъа кеслерини усталыкъларын ачыкълагъандыла. Республиканы артистлери уа концерт программа бла къууандыргъандыла.
Спорт комплекс толусунлай шёндюгюлю излемлеге келишеди. Ол республикада спортну айнытыу объектледен бек кючлюсюдю дерге боллукъду.
Къасымланы Аминат.
