Олег Нальчикденди, мектепни тауусханлай, къутхарыучуну ызын сайлап, 2003 жылда от тюшюуге къажау бёлюмде ишлеп башлагъанды. Ол жыл окъуна аны от ёчюлтюу-прикладной спортдан жыйымдыкъ къауумгъа алгъандыла. Аны санында Жашуу улу эки жылны жер-жерли, къырал даражалы эришиулеге къатышханды, алада жетишимли да болгъанды. Чырмаулары болгъан 100 метрни чабыуда спортну устасына кандидатны мардасын толтургъанды. Жыйымдыкъ къауум чачылгъанындан сора, 2005 жылда, экинчи къутхарыу бёлюмге кёчюп, беш жылны анда уруннганды. 

Ызы бла Олег Россейни Сауутланнган кючлеринде къуллукъ этгенди, алай 2014 жылда жангыдан биринчи от ёчюлтюу-къутхарыу бёлюмге къайтханды. Салыннган борчланы бет жарыкълы толтура, усталыгъы, низамы бла нёгерлерине юлгю кёргюзте, бёлюмню командирини къуллугъуна сюелгенди.  

Уллу сынамына къарамай, Олег усталыгъын дайым да ёсдюргенлей, анга ышанылгъан бёлюмню хазырлыгъын жалчытханлай турады, не къыйын болумлада да тюз оноула эте биледи. Тирилиги эм жигитлиги, ишчи нёгерлерине не заманда да билеклик этгени, гиртчилиги ючюн бёлюмде намысы да жюрюйдю. 

Белгилисича, къутхарыучуланы болушлукълары не тюрлю болумда да – гитче от тюшгенден башлап, къыйын болумлагъа, авариялагъа дери – изленеди. Олег да адамлагъа болушууну жаратханын, анга кёре уа ишин да сюйгенин билдиреди. 

- Эсимде къалгъан ишледен бири 2008 жылда болгъан эди, бизни энчи иели юйге от тюшгени ючюн чакъыргъандыла. Жетгенибизде, от юйню кёбюсюн алып, ичинде уа жыл саны жетген эр киши бла аны жашы къалып. Къауум-къауум болабыз, талайыбыз отну тышындан ёчюлтюп башлайдыла, башхала ичине атланадыла. Бир бирибизни сёзсюз ангылай эдик. Ол бизни харкюнлюк ишибиз болгъаны себепли, не этерге керек болгъаныбызны алайсыз да сезебиз. Юйню ичине киргенлей, къарт аппаны бла аны жашын мюйюшде олтуруп тургъанларын кёреме. Алагъа чыгъаргъа болушабыз, керекли болушлукъну этип, медиклеге ётдюребиз. От тюшгеннге чыкъгъан кезиуледе биреуню жанын сакълар ючюн, кесинг ёлюрге боллугъунгу толу ангылайса. Алай сени болушлугъунг, сени хайырынг бла биреу сау къаллыкъды деген сагъыш таукеллик, кюч бере, жашауда тюз сайлау этгенинге ийнандырады, - дейди командир.

Олег энчи жашауун да къурагъанды, тёрт сабийни атасыды. Къыйын ишине, арыгъанына къарамай, къутхарыуда, юйюрде да насыплы инсанды.

Кульчаланы Зульфия.