Къабарты-Малкъар къырал университетни ректоруну къуллугъун толтургъан Юрий Альтудов ЕГЭ-лерин бийик баллагъа берген, быйыл окъуугъа кирген жаш адамла бла тюбешгенди эмда студент болгъанлары бла алгъышлагъанды. Аллай тюбешиулени къурау а энди окъуу юйде ахшы тёреге бурулгъанды.
Быйыл университетге Бир къырал сынауларын бийик эсеплеге жазгъан 170 студентни алгъандыла окъургъа. Саулайда биринчи курсха уа 5000 адам киргенди. Ол шарт а КъМКъУ регионда алчы бийик билим берген окъуу махкемеге саналгъанын белгилейди.
Жаш тёлюню аллында сёлеше, Юрий Камбулатович аланы алда жарыкъ, зауукълу, аны бла бирге уа сейир студент жылла сакълагъанларыны юсюнден айтханды. «Терен билим алыргъа итинигиз, жетишимлеге талпыныгъыз эмда илмуну бла жамауатны айныуларына къошумчулукъ этигиз», - дегенди.
Дагъыда университет жашлагъа бла къызлагъа жашауда кеслерини жолларын табаргъа, усталыкъ жаны бла да ёсерге ахшы онгла бергенини юсюнден хапарлагъанды. Мурдорлу билим алгъанларындан тышында да, ала илму-тинтиу ишлеге къатышырча, мында бир ненча ара болгъанын айтып, аланы юслеринден да билдиргенди.
Тюбешиуню кезиуюнде жаш адамла соруула да бергендиле. Ала уа асламысында производстволу практика окъууну заманында къалай бардырылгъанын эмда ала сайлагъан усталыкълагъа сурам бюгюнлюкде къаллай болгъанын билирге сюйгендиле.
Юрий Альтудов ангылатханнга кёре, билим бериуде тюрлениулеге тийишлиликде, практиканы университетни партнёрларына саналгъан предприятияларында ётюу борчлу халдады. Алай эсе да, кеслерини энчи ишлерин ачаргъа уа жашлагъа бла къызлагъа аланы диплом ишлери себеплик этип къояргъа да боллукъдула. Университет жаш алимлени бла предпринимательлени магъаналы проектлерине тутхучлулукъну дайым да этгенлей келеди.
- КъМКъУ-ну, регионну эмда къыралны даражаларында жаш тёлюге тутхучлулукъ этиу – ол аланы фахмуларын ачыугъа эмда айнытыугъа ахшы амалладан бириди. Бизни студентлерибизни предпринимательлик ышанлары ючюн алагъа экспертле салгъан багъалагъа къарасанг, ала Къабарты-Малкъарда диплом алгъанларындан сора, кеслерини ишлерин ачаргъа мурат этген жаш адамланы саны бирси регионладан эсе аслам болгъаны ачыкъланады. Ол а предприниматель культураны бийик даражасыны эмда жаш тёлюню тири болгъанын шартыды, - деп чертгенди Юрий Камбулатович.
Ызы бла уа окъуу юйню таматасы бир кесек заман озгъандан сора биринчи курслада окъугъанла бла дагъыда жангыдан тюбеп, аланы окъуу жаны бла ал сезимлерини эмда мында алгъан сынамларыны юслеринден билирге сюйгенин да айтханды. Барысына да жетишимле тежеп, ахшы муратлагъа итинирге чакъыргъанды.
Трамланы Зухура.
