«Хэкум и хъумакIуэхэр» фондым и Къэбэрдей-Балъкъэр щIыналъэ къудамэр юридическэ IуэхухэмкIэ ядоIэпыкъу Украинэм щекIуэкI дзэ Iуэху хэхам хэтхэм, абы   и ветеранхэм, зауэлIхэм я унагъуэхэм. Закъыхуэзыгъазэхэм я хуитыныгъэхэм теухуа чэнджэщхэр ират, дэфтэр зэхуэмыдэхэр щызэхуахьэскIэ щагъэпсынщIэ, хуэныкъуэ хъумэ, хабзэхъумэ IуэхущIапIэхэмрэ судхэмрэ я хуитыныгъэхэр зэрыщыпхагъэкIынум и мардэхэр гурагъаIуэ. «Хэкум и хъу­макIуэхэр» фондым зэгурыIуэныгъэхэр ярищIылIауэ ядолажьэ КъБР-м и Проку­ратурэм, Дзэ прокуратурэм, КъБР-м и Нотариальнэ палатэм, ЦIыхум и хуитыныгъэ-хэмкIэ и уполномоченнэм и IуэхущIапIэм, нэгъуэщIхэми. 

«Хэкум и хъумакIуэхэр» щIыналъэ фондым Тэрч районым щиIэ и къудамэм зыхуигъэзащ СВО-м и ветеран Хьэрыс Ислъам. Коммунальнэ Iуэхутхьэбзэхэм ехьэлIауэ ветеранхэм папщIэ щыIэ льготэхэм ар щигъэ­гъуэзащ фондым и район къудамэм и лэжьакIуэ Акъсорэ Каринэ. Абы зауэлIым чэн­джэщ иритащ псэупIэ-коммунальнэ Iуэху­тхьэбзэхэм я IуэхукIэ ветеранхэм ират Iэмалхэмрэ хуитыныгъэхэмрэ къигъэсэ­бэпыным теухуауэ. Хуигъэхьэзыращ МФЦ-м ирагъэхьыну дэфтэрхэри. ЗауэлIым фIыщIэ ищIащ фондым зэрызыхуигъэза Iуэхур икIэ­щIыпIэкIэ зэрызэфIагъэкIам папщIэ.
Хьэрыс Ислъам Тэрч районым хыхьэ ­Арыкъ къуажэм къыщалъхуащ. Курыт еджапIэр къиуха нэужь, техникэ училищэм фIыуэ щеджащ, дзэм щраджэм, Ар­хан­гельск  ­областым къулыкъу щищIащ. 
2022 гъэм и фокIадэм Ислъам ягъэкIуащ Украинэм щекIуэкI дзэ Iуэху хэхам. СВО-м тIасхъэщIэхыу щыIащ, пщIэрэ щIыхьрэ иIэу игъэзэщIащ къэралым къалэн къыщищIар. ЛIыгъэрэ хахуагъэрэ къигъэлъэгъуащ щIалэм. ИужькIэ, Хьэрысыр унэм къагъэкIуэжащ, бын куэд зэриIэр къалъытэри. 

ГЪУЭТ Синэ.