ЦIыхухэм Iуэхутхьэбзэ яхуэщIэнымкIэ IэнатIэм илъэс куэд лъандэрэ хьэлэлу пэрытщ «Налшык - Дыгулыбгъуей» гъуэгум тету и автобус цIыкIумкIэ цIыхухэр ­къезышэкI Абазэ Анзор. Зи IэщIагъэм хуэIэижь а щIалэм сакъыу, набдзэгуб­дзаплъэу, гуапэу  пассажирхэр кърешэкI, гъуэгум щызекIуэ хабзэхэм тету, ахэр къызэпимыуду. 

Анзор езыри Дыгулыбгъуей адыгэ жылэшхуэм къыщалъхуащ. Курыт школыр хъарзынэу къиуха нэужь, дзэм ираджащ, Хэкум къулыкъу хуищIэну. ЩIыхь зыпылъ апхуэдэ къалэныр Абазэм щигъэзэщIащ Германием, абы щыIэ советыдзэ гупым (ГСВГ) и танк дивизэм и тIасхъэщIэх батальоным хэту. А къалэныр пэжу, щытхъурэ фIыщIэрэ пылъу зэфIигъэкIащ. Щалъхуа щIыналъэм 1981 гъэм и бжьыхьэм къэкIуэжа нэужь, шофер IэщIагъэм нэхъри хуэIэижь хъуащ. Ар хьэлэлу лэжьащ хьэлъэзешэ машинэшхуэхэм ису, гъуэгуанэшхуэхэр къэралым щызэпичу. 
2003 гъэ лъандэрэ Абазэ Анзор тетщ Налшыкрэ Дыгулыбгъуейрэ зэпызыщIэ автомобиль гъуэгушхуэм, цIыхухэр кърешэкIри. Зэи къэхъуакъым абы и машинэр зыхуей хуэмызауэ гъуэгу щытехьа. Ар зэрысыр сыт щы­гъуи къабзэщ, екIущ. Нэхъыщхьэращи, ­къришэкI цIыхухэм гуапэу, щабэу, гушыIэ хэлъу яхущытщ, и машинэм къыщеуэ макъамэ щабэмкIэ дэрэжэгъуэ яритыну, я гукъыдэжыр къиIэтыну хущIэкъуу. Дауи, махуэ къэс гъуэгум тет икIи абы иригъэзэша шофер щIалэхэм къахокI ныкъуэкъуэн зыфIэфI, пщIэрэ нэмысрэ зыхэмылъ. Анзор апхуэдэкъым. ЦIыхум яхуищI пщIэмрэ нэмысымрэ къагъэлъагъуэ езыр апхуэдэ фIыгъуэхэм зэрыхуэмыхейр. 
Анзоррэ и щхьэгъусэ Риммэрэ бынищ зэдапIащ, унагъуэ дахэу тIур ягъэтIысыжащ, адрейми мыгувэу поплъэ. Нэхъыжьхэр ягъэгушхуэ я бынхэм къащIэхъуэ щIэблэ дахэм я ехъулIэныгъэхэм. 
Хьэлэлу зи IэнатIэр езыхьэкI Абазэ Анзор ди гуапэщ узыншэу, бэIутIэIуншэу иджыри куэдрэ лэжьэну, Iуэхутхьэбзэ зыхуищIэ цIыхухэм я арэзыныгъэм гъуэгу захуэ, дахэ къриту!
КЪАРДЭН  Ритэ.