МЧС-ни регионда Баш управлениясындан билдиргенлерине кёре, 2025 жылны аллындан башлап тауларыбызда жолоучулукълагъа 8 мингден аслам инсан чыкъгъандыла, ала барысы да ведомствода эсепге тургъандыла.
Республикабызда ич туризм къыстау айныгъаныны хайырындан бери солургъа быйыл 900 мингден аслам турист келгендиле. Аланы къоркъуусузлукъларын МЧС-ни бёлюмю жалчытханды. Эсигизге салайыкъ, Кавказ тауланы асламысы Къабарты-Малкъарны жериндеди, Россейни бийикликлери 5-мингнге жетген 8 тауундан 7-си мында орналыпдыла.
Жылны кезиуюне эмда оператив болумгъа кёре, къоркъуу чыгъарына ишеклилик туудургъан альпинист эм турист жерледе къутхарыу постла дайым къураладыла. Бусагъатда къутхарыучула Чегем ауузунда парадромда, Адыр-Суу бла Адыл-Суу ауузлада, Бызынгы альплагерьде къалауурда турадыла. Жылны аллындан башлап, МЧС-ни Элбрус бийик тау излеу-къутхарыу отрядыны къутхарыучулары 101 излеу операция бардыргъандыла, алада 105 адамны жашауун сакълагъандыла, жарсыугъа, 12 адамгъа болушургъа онг чыкъмагъанлай, ала ёлгендиле. Къутхарыу ишлени кёбюсю бийик таулада эм къыйын болумлада тамамланылгъанларын да белгилерге тийишлиди.
Туристлени излеу бла бардырылгъан ишлени тинтиу быллай шартланы ачыкълагъанды. Биринчиден, жолоучулукъгъа чыкъгъанда, тапсыз заманны сайлау неда жолну энчиликлерин билмеу, турист къауумну келечилерини кюч-чыныгъыу жаны бла халларына тюз багъа бичмеу. Экинчиден, жолну къыйынлыгъына кёре, керекли затланы алмай къоюу неда качествосу аман кереклени хайырланыу. МЧС-де жолоучулукъларын эсепге салмай, таулагъа баргъанлагъа болушуу къыйын болады, аланы къайда ажашханларын, къыйын болумгъа тюшгенлерин тохташдырыр ючюн, кёп заман къоратылады. Анга кёре уа болушлукъ да кечигип тапдырылады. Сунмай тургъанлай кюнню халы терк тюрленнгени, ташла тюшгенлери неда жер юзюлгени да солууну бузадыла.
Бу болумла бла байламлы ведомство адамлагъа таула къоркъуу хар заманда да болгъан жерге саналгъанларын эсгертеди. Алай эсе уа, къутхарыучула бла байламлыкъда турургъа, жолоучулукъну юсюнден алагъа алгъадан билдирирге керекди. Жолгъа атланырдан алгъа, кюнню халына, ол къалай тюрленирге боллугъуна, башха къаллай къоркъуу чыгъарына къайтарып къараргъа тийишлиди. Спутник телефонну неда GPS-трекерни биргегизге алыргъа да унутмагъыз, болушлукъну чакъыргъанда, ала керек боллукъдула.
