Белэ Речкэ къуажэм дыгъуасэ къы­щызэIуахащ амбулаторэщIэ. Ар Налшык и къалэ поликлиникэ №1-м и къудамэхэм ящыщ зыщ. Нэхъапэм амбулаторэ щы­лэжьар 1934 гъэм яухуа унэрати, шэч хэмы­лъу, иджырей жыпхъэхэм къи­за­гъэ­жыртэкъым. Лэжьыгъэр ирагъэ­кIуэ­кIащ ди Президент Путин Владимир и ­жэрдэмкIэ къыхалъхьа «ГъащIэ кIыхь икIи жы­джэр» лъэпкъ проектым республикэр зэ­рыхыхьам и фIыгъэкIэ.

АмбулаторЭщIэр зригъэлъэгъуащ ­КъБР-м и Iэтащхьэ КIуэкIуэ Казбек. Ар Белэ Речкэ къуажэм и кум хуэзэу яухуащ, абы иубыд щIыпIэр метр зэбгъузэнатIэу 350-рэ ­мэхъу. IуэхущIапIэм къегъэщIылIащ жылэм щыпсэу цIыху мини 3,5-м щIигъу. 
IэнатIэр къызэгъэпэщащ медицинэм и иджырей жыпхъэхэм къитIасэ Iэмэпсы­мэ­хэмкIэ. Мыбы щагъэзэщIэну къалэн нэ­хъы­щ­хьэхэм къищынэмыщIауэ, щылэжьэнущ махуэ стационар, апхуэдэуи физиоте­ра­пиемкIэ пэш щхьэхуэ хэтынущ. Амбу­ла­-торэм къегъэбыдылIа щIыпIэ зэпэщ  ящIащ. 
КIуэкIуэ Казбек епсэлъащ IуэхущIапIэм и медицинэ IэщIагъэлIхэм, къыхигъэщащ IэнатIэр тыншыпIэм хуэщIауэ къызэрызэрагъэпэщар, апхуэдэуи ар гупым ехъуэхъуащ ехъулIэныгъэ яIэу лэжьэну.
ЗэIущIэм хэтащ ди лIыхъужь, дзэ Iуэху хэхам и ветеран, езыр уIэгъэ зэрыхъуам хуэ­дэу, зэхэуэ щекIуэкI щIыпIэм фэбжь хьэлъэ зыгъуэта ныбжьэгъур къизыха Жашуев ­Аслъэн. Къигъэлъэгъуа хахуагъэр ирагъэлъапIэу абы къратащ «И лIыгъэм ­пап­щIэ», «ХэкIуадэхэр къызэрыригъэлам пап­щIэ» дамыгъэхэр. Иджыпсту респуб­ликэм узыншагъэр хъумэнымкIэ и IэнатIэм и лэжьыгъэм щыпещэ.
«Белэ Речкэ къуажэм щыпсэухэм ам­бу­латорэщIэмкIэ сынывохъуэхъу, узыншагъэ быдэ фиIэу, а IуэхущIапIэм фы­щIе­кIуэ­лIэн щхьэусыгъуэ фи мащIэу фыпсэуну си гуа­пэщ», - жиIащ КIуэкIуэ Казбек.

*   *   *

А махуэм иджыри зы амбулаторэщIэ къыщызэIуахащ Кэнжэ къуажэм. Ари яу­хуащ «ГъащIэ кIыхь икIи жыджэр» лъэпкъ проектым хыхьэ, «Узыншагъэр хъумэным-кIэ IэнатIэм цIыхухэм япэ медицинэ дэIэпыкъуныгъэхэр щыхуащIэ и IуэхущIапIэхэр къэгъэщIэрэщIэжын» къэрал программэмкIэ.
Амбулаторэр Налшык дэт поликлиникэ №3-м и къудамэщ. Абы медицинэ Iуэхутхьэбзэхэр щыхуащIэ цIыху мини 6-м щIи­гъум.
УхуэныгъэщIэм метр зэбгъузэнатIэу          580-рэ еубыд. Иджы мыбы махуэ стационар щылэжьэнущ, апхуэдэуи нэхъапэкIэ ямы­Iауэ физитерапие пэш хэтщ.
1960 гъэм яухуауэ щыта унэжьым Iэна­-тIэм и лэжьыгъэр тэмэму къыщызэгъэпэща хъуртэкъым. Иджыпсту сымаджэхэми Iэ­щIа­гъэлIхэми тыншыпIэ къыхузэрагъэпэщащ. IуэхущIапIэхэм къепха щIыпIэри зы­хуей хуагъэзащ. 
КIуэкIуэ Казбек медицинэм и лэжьакIуэ­-хэм ехъуэхъуащ зыпэрыт Iуэхум ехъулIэну, къуажэдэсхэм узыншагъэ быдэ яIэну.