Хар жылны кесини бир башламчылыкълары болады.  Быйыл «Билет в будущее» эм «Россия – мои горизонты» деген курсла кийириледиле.

Биринчи проектни чегинде сабийлеге усталыкъланы юслеринден толу хапар айтыллыкъды. Жарсыугъа, онбиринчи классны бошай туруп да, кёпле къайда окъургъа, не усталыкъны сайларгъа билмей, абызырап къаладыла. Бир-бир тыш къыраллада бу болумну эсге алып, выпускникле бла психологла ишлейдиле, сора ала тюзюнлей ол жыл окъуугъа кирмей, бир жылны юйлеринде турадыла. Ашыкъмай, сагъыш этерча. Артда сайлауларына сокъуранмазча.

Статистика шагъатлыкъ этеди: бийик билим алгъандан сора усталыкъларына кёре ишлегенле аздыла. Алимле айтадыла: «Усталыгъына кёре ишлемесе да жаш адам, аны вузда окъугъан заманы хайырлыды. Биринчиден, бийик билими болгъан адамны акъылы, къылыгъы да башхаракъ болады, ол батырыракъды, кесини иш къураргъа да амалы боллукъду. Экинчиден, хар жамауатны тутуругъу да билимли адамладыла. Аладыла дунияны айнытхан». Сёзсюз, терек бахчала ёсдюргенле, малчылыкъ бла кюрешгенле, жерден хайыр ала билгенле да керекдиле, алай бу ишлени окъуна шёндю бийик билимлиле тамамлайдыла. Билим ишге кёллендиргени баямды.

«Билет в будущее» курсну чеклеринде тестле ётерге боллукъду, ала сабийни энчи ышанларын ачыкъларыкъдыла, къайда жетишимли боллугъун да кёргюзтюрюкдюле.

Экинчи курсну чеклеринде уа сабийлеге бизни къыралыбызны юсюнден айтырыкъдыла. Бусагъатда интернетде басмаланнган затланы окъугъан сабийни бизни къыралны юсюнден ангылауу боллукъ тюйюлдю. Бизни жетишимлерибиз – космосдан башлап балетге дери да – бек бийикледиле. Адабиятны алсакъ да, Достоевский, Гоголь, Толстой, Пушкин, Ахматова, дагъыда кёп белгили жазыучула бла поэтле – къайсы къыралны барды аллай байлыгъы? Кёп миллетле жашагъан Россейде болгъан  халкъ чыгъармачылыкъ –  жомакъла, халкъ жырла, устала ёмюрден ёмюрге алтын къоллары бла этген ариулукъ  – къайда табыллыкъды быллай тамаша байлыкъ?! 

Сёзсюз, хар къырал кесин махтагъан кезиуде, бизни школларыбызда, вузларыбызда патриот юйретиу хазна бардырылмай тургъанды. Аны хатасындан кёп жаш адамларыбыз тыш къыраллагъа кетгендиле. Энди ол чурум кетерилликди. Къырал Ата журтубузгъа кертичи боллукъ  адамланы ёсдюрюуге аслам эс бурлукъду. 

Байсыланы Марзият.