«Къэбэрдей-Балъкъэр» хъыбарегъащIэ IэнатIэм къызэригъэпэщри, дыгъуасэ Налшык къалэм ПечатымкIэ и унэм пресс-конференц щекIуэкIащ. Ар траухуат Урысей Федерацэм терроризмэм зэгъусэу щы­пэщIэтыным и махуэм (фокIадэм и 3-м тохуэ). Фигу къэдгъэкIыжынщи, а фэеплъ махуэр ягъэуват 2004 гъэм фокIадэм и 1 - 3-хэм Беслъэн къалэм къыщыхъуа гузэвэ­гъуэм иужькIэ.

Республикэм и хъыбарегъащIэ IэнатIэхэм я лIыкIуэхэмрэ блогерхэмрэ къаIущIащ КъБР-м и Правительствэм и УнафэщIым и къуэдзэ Къуэшырокъуэ Залымрэ КъБР-м и Прокуратурэм и къудамэм и унафэщI Шурдым Анзоррэ. 
- ЗэрытщIэжщи, 2004 гъэм фокIадэм и 1 - 3-хэм Беслъэн къалэм къыщыхъуа террор щIэпхъаджагъэм цIыху 330-м щIигъу, ­нэхъыбэр сабийуэ, хэкIуэдауэ щытащ. Апхуэдэ Iуэхугъуэ шына­­гъуэхэр иужькIи къыщыхъуащ Кавказ Ищхъэрэм и щIыналъэхэм. Ди республикэри абы щыгъуэм гугъуехьхэм хэтащ, къэрал къулыкъущIэхэми, хабзэхъумэхэми, хьэрычэтыщIэхэми щIэпхъаджащIэ гупхэр щатеуэ щыIэу. Къэбэрдей-Балъкъэрым и хабзэхъумэ IуэхущIапIэхэм я ­къарукIэ къызэтрагъэувыIэфащ IэщэкIэ узэда гупхэр. Ауэ, нобэми, а Iуэхур дызытеплъэкъукI мыхъунухэм ящыщщ, бзаджащIэхэм я мурадхэр IэщIыб зэрамыщIыр къэплъытэмэ. Нобэ дыхуейщ терроризмэм пэщIэ­тыным хуэгъэзауэ едгъэкIуэкI лэжьыгъэм фыщыдгъэгъуэзэну, цIыхухэм я деж ахэр нэфхьэсыну, - жиIащ Къуэшырокъуэ Залым пэублэ псалъэу. 
Шурдым Анзор тепсэлъыхьащ къаIэта Iуэхум мы зэманым мыхьэнэшхуэ зэриIэмрэ я лэжьыгъэр зэраубзыху щIыкIэмрэ.
Журналистхэмрэ хьэщIэхэмрэ тепсэлъыхьащ зи гугъу ящIым ­теухуауэ хъыбарегъащIэ IэнатIэ­хэмрэ къэрал IуэхущIапIэхэмрэ зэдэлэжьэным иIэ мыхьэнэм. «ЛъэныкъуитIми ди къалэнщ экстремизм гупсысэхэм цIыхухэр пэIэщIэ ящытщIыныр, жылагъуэ узыншэу, бэIутIэIуншэу дыпсэу­ным дытелэжьэныр. Абы щхьэкIэ къэрал IуэхущIапIэхэм ирагъэкIуэкI лэжьыгъэр цIыхубэм я деж нэтхьэсын, социальнэ сеть­хэм щызэбграгъэкI хъыбар нэпцIхэм пэIэщIэ тщIын хуейщ. Дауэ хъуми, терроризм Iуэхум хэтхэми цIыху нэхъыбэ зэрызэхашэн, къызэрыдахьэхын IэмалыщIэхэр къагупсыс. Абыхэм цIыхухэр ящытхъумэнырщ фэри дэри дызэлэжыр», - къыхигъэщащ Къуэшырокъуэм. 
Шурдым Анзор жиIащ экстремизм гупсысэхэр цIыхухэм нэхъыбэу къызырахыр Интернетыр зэрыарар, абы и лъэныкъуэкIэ зэпымыууэ IуэхущIапIэм со­циаль­нэ сетьхэр зэрыщIип­щы­тыкIыр. «Ди къэкIуэнур зэпхар щIалэ­гъуалэрщ, абыхэм хэхауэ ди нэIэ ятетын хуейщ. Ауэ, ди жагъуэ зэрыхъунщи, ахэри Iуэху мыхъу­мыщIэхэм щыхэхуэ ­къохъу. Абы и зы щапхъэщ иджыблагъэ ныбжьыщIи 5 дубыдын хуей щIэхъуар. Мы зэманым абыхэм я Iуэхур зэхыдогъэкIри, уегуп­сыс­мэ, псори унагъуэ хъарзынэхэм къыщохъу. ЖысIэнуращи, дэхуэхакъым, гугъуехь пэщIэхуакъым, я гуп­сысэр пэжымкIэ унэтIын ­хуейуэ аркъудейщ», - къыхигъэщащ Шурдымым.
Абы теухуауэ Къуэшырокъуэ Залым дыщIигъуащ мы зэманым къэралым щIалэгъуалэм ядэлэ­жьэным гулъытэшхуэ зэрыхуи­щIыр. «Курыт школхэм зэман кIыхькIэ егъэджэныгъэ къалэ­ным фIэкIа ямыгъэзащIэу щытамэ, иджы къэралым законкIэ щIигъэбыдащ гъэсэныгъэ лэ­жьыгъэри еджапIэм пщэрылъ зэрыщащIыр. ЦIыхур и узыншагъэм зэрегугъум ещхьу, абы и гъэсэныгъэми кIэлъыплъыпхъэщ, унагъуэм исхэм я деж къыщыщIэдзауэ зыхыхьэ жылагъуэм щыщIэкIыжу. Абы щы­гъуэщ зэныбжьэгъугъэр, лъэпкъ зэхущытыкIэхэр, хэку лъагъуныгъэр зыхащIэу щIэблэр къыщы­тэджынур», - жиIащ Къуэшырокъуэм.
Ар къытеувыIащ 2005 гъэм и жэпуэгъуэм Налшык къалэм щIэпхъаджащIэхэр къызэрытеуэрэ илъэс 20 зэрыдэкIыжам, икIи абы ипкъ иткIэ, КъБР-м и Iэтащхьэм пщэрылъ къазэрыщи­щIар республикэм щрагъэ­кIуэ­кIыну фэеплъ Iуэхугъуэхэр зыгъэбелджылыну къызэгъэпэщакIуэ гуп зэхашэну. Апхуэдэуи ар тепсэлъыхьащ терроризм, экстремизм Iуэхухэм къыхэкIы­жын мурад зиIэхэр гъащIэм хэгъэзэгъэжынымкIэ КъБР-м и Iэтащхьэм деж щыIэ комиссэр зэрылажьэ щIыкIэми. «ЦIыху лъэпэрэпам и къуаншагъэр къы­щыгурыIуэжкIэ ди щIыб хуэд­гъазэркъым, апхуэдэхэм дадэ­Iэпыкъуну дыхьэзырщ», - къыхигъэщащ къэпсэлъам.
Журналистхэр щIэупщIащ язы­ныкъуэ мессенджерхэр цIыхухэм къагъэсэбэпыну хуитыныгъэ ямыIэу фокIадэ мазэм ящIыну къызэрыхалъхьар сэбэп зэры­хъуну щIыкIэм. Къуэшырокъуэм жиIащ илъэс зыбжанэ хъуауэ къэпщытэныгъэ ирагъэкIуэкIахэм ар къызэрыхэкIар, иджы абыхэм я пIэ зэрырагъэувэр ди къэралым езым и Iэмалхэр. Абыхэм цIыхухэр щахъумэнущ хъыбар нэпцIхэмрэ Iуэху мыхъумыщIэ­хэмрэ. 
ЗэIущIэм щытепсэлъыхьащ нобэрей щIэблэр Интернетым къызэрипшын, абы зэрызебгъэужьын Iэмал куэд къэралым къызэригупсысым. Псалъэм пап­щIэ, октябрята, пионер, комсомол зэгухьэныгъэхэм я пIэ «Пашэхэм я зэщIэхъееныгъэ» жылагъуэ IуэхущIапIэр къызэриувар, абы къалэнышхуэ зэрызэ­фIигъэкIыр, щIалэгъуалэ центрхэм дэтхэнэ сабийми и къэухьым сыт и лъэныкъуэкIи зэрызыщрагъэужьыфынур, нэгъуэщIхэри.
КъаIэта Iуэхухэм ящыщщ уэрамым зыгуэр къыщыхъуамэ, дэIэпыкъуэгъу хъун зэ­рыхуейр ящыгъупщэу, телефонхэмкIэ ­видео трахыу зэрыщIадзэр, ар къызэремызэгъыр цIыху­хэм я деж зэрынэхьэсыпхъэри къыхагъэщащ.
ЖаIар щIигъэбыдэжу, Къуэшы­рокъуэм щапхъэу къихьащ Лъэпкъ щэнхабзэ хъугъуэфIы­гъуэхэмрэ хабзэхэмрэ хъумэным ехьэлIауэ къэралыр зэлэжьыпхъэхэм и лъабжьэр УФ-м и Президентым и УнафэкIэ 2022 гъэм къызэрыдагъэкIар. «А дэфтэрыр хуэгъэзащ Урысейм щыпсэу дэтхэнэ лъэпкъми. Абы ехъумэ дгъэлъапIэ ди щIэинхэри, лъэп­къыбзэри, щэнхабзэри. Ди лъэпкъ гупсысэкIэр тхуэхъумэрэ щIэблэр тхуэгъасэмэ, къэкIуэн диIэнущ. Хэбгъэзыхьмэ, а дэфтэрым къыщыгъэлъэгъуахэр экстремизмэми зэрыпэщIэт Iэмалу къэплъытэ хъунущ», - дыщIигъуащ Къуэшырокъуэм.

БАГЪЭТЫР Луизэ.