ШыщхьэуIум и 25-28 махуэхэм Налшык къалэм щокIуэкI симфоние музыкэмкIэ «Темыркъаным и пшыхьхэр» фестивалыр. Ар къызэрагъэпэщ СССР-м, РСФСР-м, КъБР-м я цIыхубэ артист, УФ-м и Къэрал саугъэтымрэ Глинкэм и цIэр зезыхьэ ­саугъэтымрэ я лауреат, литературэ, гъуазджэ унэтIыныгъэхэмкIэ Урысейм и Къэрал саугъэтыр зыхуагъэфэща,    Санкт-Петербург щIыхь зиIэ и цIыху, а къалэм и къэрал филармонием и Академическэ симфоние оркестрым и художественнэ унафэщI къулыкъум илъэс 30-м щIигъукIэ пэрыта, дуней псом къыщацIыху, оркестр цIэрыIуэ зыбжанэм я тхьэмадэ, дирижёр цIэрыIуэ Темыркъан Юрэ и фэеплъу. 

Къэбэрдейр Урысейм зэ­ры­гухьэрэ илъэс 400 зэрыри­къум и цIэр зезыхьэ утым шыщ-хьэуIум и 25 - 26 махуэхэм щагъэлъэгъуащ Темыркъан Юрэ зи унафэщIу щыта симфоние оркестрым и концертхэм щыщ. Абдеж утыку къыщрахьащ ди лъэпкъэгъу артист гъуэзэджэм и гъащIэмрэ гуащIэмрэ ятеухуа документальнэ фильми. 
ШыщхьэуIум и 27 - 28 махуэ­хэм Музыкэ къэрал театрым ще­кIуэкIащ дуней псом къы­-ща­цIыхуа, Темыркъан Юрэ зи художественнэ унафэщIу илъэс 35-кIэ щыта, Санкт-Петербург и къэрал филармонием и Ака­демическэ симфоние оркестр Шостакович Дмитрий и цIэр зезыхьэм и концертхэр. 
- ПщIэ зыхуэсщI ныбжьэгъу­хэ, концертым зыкърезыгъэ­хьэ­лIахэмрэ Санкт-Петербург и филармонием и оркестр цIэ­рыIуэмрэ ди гуапэу фыкъыдогъэблагъэ! Хабзэ дахэ хъуауэ, фестивалым хыхьэ концертхэм къытхуэмыгъэсу гъэ къэси дыпоплъэ, - жиIащ КъБР-м щэн­хабзэмкIэ и министр Къумахуэ Мухьэдин, пшыхьыр къыщызэ­Iуихым. 
ШыщхьэуIум и 27-м оркест­рым игъэзэщIащ композиторхэу Цеслюкевич Иринэ, Андерсон Лерой, Петровэ Ольгэ, Стравинский Игорь, Манафовэ Маринэ, Троян Вацлав, Элгар Эдуард, Римский-Корсаков Николай, Сен-Санс Камиль, Бриттен Бенджамин сымэ я лэ-       жьыгъэхэм щыщ. Дирижёрхэр - дунейпсо зэпеуэхэм я лауреат Ньягэ Алексейрэ ди лъэпкъэгъу, дунейпсо зэпеуэхэм я лауреат, КъБР-м и Музыкэ къэрал театрым и дирижёр нэхъыщ-хьэ Лэкъун Азэмэтрэщ. 
ШыщхьэуIум и 28-м концертым и программэм хыхьэу ягъэ­зэщIащ Чайковский Пётррэ Прокофьев Сергейрэ я симфоние лэжьыгъэхэм щыщ. Дирижёрыр Санкт-Петербург филармонием и оркестр Шостакович Дмитрий и цIэр зезыхьэм и дирижёр нэхъыщхьэ, УФ-м и цIыхубэ артист Алексеев Николайщ. УэрэджыIакIуэр дуней-псо зэпеуэхэм я лауреат Хрычев Дмитрийщ. 
КъыжыIапхъэщ, дунейр мы­уэ­фIами, япэ пшыхьым цIы­хушхуэ зэрызэхуишэсар, классикэ макъамэр фIыуэ зылъа-гъухэм мы пшыхьхэр псы Iубыгъуэ пэлъытэ зэрахуэхъуар. Зэ­хуэсахэм яхэтт гъэ къэси «Те­мыркъаным и пшыхьхэр» къы­зы­хуэмыгъэсу пэплъэхэр, дуней псом къыщацIыхуа маэст­рэм и лэжьыгъэхэм едэIуэну япэу екIуалIэхэр. 
Макъамэр гуапагъэкIэ, мамырыгъэкIэ зэрыгъэнщIам, цIыхухэр дахагъэм, фIым къы­зэрыхуриджэм и щыхьэтт мы фестивалыр. 
Фестивалым хуагъэхьэзырат Темыркъан Юрэ и гъащIэмрэ гуащIэмрэ теухуа гъэлъэгъуэ­ны­гъэхэри, ахэри щIэщыгъуэ дыдэт еплъахэм дежкIэ. 

ТЕКIУЖЬ Заретэ.