Жангы окъуу жылны аллында кёп сабийли эм къыйын жашау болумгъа тюшген 130 юйюрге «Сабийни школгъа хазырла» акцияны чеклеринде окъуу керекле, кийимле да юлешиннгендиле. Жандауурлукъ жумушланы КъМР-ни Муслийманларыны дин управлениясы, «Баракат» жандауурлукъ фонд, волонтёрланы «Помоги ближнему» организациясы эм тиширыуланы башламчылыкъларына себеплик жаны бла «Жемчужина» жамауат биригиу къурагъандыла.
Республиканы ара межгити тюнене сабий ауазладан толу эди. Школда дерсле башланырны аллында ала саугъала къоллу болгъандыла: дефтерле, альбомла, сурат ишлерча керекле, илляула.
Тюбешиуну ача, республиканы муфтийини орунбасары Алим Сижажев бу чомарт ишге муслийманла хар жылдан да къатышханларын белгилегенди:
- Сабийни школгъа жыяргъа билеклик этген магъаналыды, бютюнда къыйын жашау болумгъа тюшгенлеге. Кёп зат сатып алыргъа керекди, къоранчла уллудула. Юйюрде бир ненча бала бар эсе уа, билеклик бютюнда керекди. Быллай жандауурлукъ жумушла бардырып, жамауатны эсин ёсюп келген тёлюню кереклерине бурургъа кюрешебиз,-дегенди ол.
Алим Сарабиевич бу жумушлагъа себеплик этген «Сабийни дуниясы» тюкеннге ыразылыгъын билдиргенди.
Алгъаракълада уа быллай жандауурлукъ иш Чегем районда да бардырылгъанды. Анда 50 юйюрге болушлукъ этилгенди.
Тикаланы Фатима.
Сурат авторнуду.
