Жабылыугъа сыйлы къонакъла – Ставрополь крайны Правительствосуну башчысыны орунбасары, финансла министр Лариса Калинченко, Россейни Президентини СКФО-да толу эркинликли келечисини аппаратыны жамауат проектлени жашауда бардырыу жаны бла департаментини эксперти Светлана Самофалова, Ставрополь крайны губернаторуну болушлукъчусу Елена Букша, Къабарты-Малкъарны жаш тёлюню ишлери жаны бла министри Азамат Люев – чакъырылгъандыла.
Байрам форумну гимни эшитилип, «Максимум» ансамбльны тепсеую эмда уллу «Машук» юйюрню бирлигин ачыкълагъан флешмоб бла башланнганды. Жыйылгъанланы Ставрополь крайны губернатору Владимир Владимировну атындан Лариса Калинченко алгъышлагъанды.
- Бюгюн бизни къууандыргъан бир ненча шарт барды, аладан бири – Къырал байракъны кюнюн белгилеудю. Мен билгенликден, сизни кёбюгюз аны Машукну тёппесине чыгъаргъансыз – ол бизни ахшы тёребизди. Форумгъа биринчи кере къатышханланы энчи алгъышларгъа сюеме, энди сиз «Машукну» уллу юйюрюню кесегисиз. Жангы билим алгъансыз, жангы тенгле тапхансыз, 2026 жылда августда жангыдан къалайда тюбеширигигизни да билесиз. Форумну бардыргъанлагъа, насийхатчылагъа, мында сейир окъууну, ырахатлы болумну къурагъанланы барысына да ыразылыгъымы билдиреме. Сизни нюрюгюз алай кючлюдю, чыракъ жанмай къалса да, тёгерекни жарытырча, - дегенди ол.
Светлана Самофалова уа ёсе келген тёлюлени жашаугъа хазырлауда устазла бла юйретиучюле уллу иш тамамлагъанларын белгилегенди: «Жаш адамланы кёллендирген, алагъа тюз жолну кёргюзтген, керти тин байлыкъла бла шагъырей этген сизсиз. «Машук» жыл сайын регионларыгъызгъа жангы билим, сейир умутла бла къайтырыгъызгъа себеплик этген майданды. Тамблагъы кюн сизни къолугъуздады».
Ахырында уа форумну директору Иван Пальцев сёлешгенди.
– Форумну бошалгъаны жангы кезиуню башланнганы бла тенгди. Бюгюн биз экинчи сменни эсеплерин чыгъарабыз. Бизге, «Машукну» къурагъанлагъа, ол форумну бошалгъаныны угъай, келир жылда 17-чи форумгъа хазырланып башларыгъыбызны белгисиди, анда хар биригизни да сакълайбыз. Бир биригизге, бизге саугъалагъан жылыуугъуз эмда нюрюгюз ючюн сау болугъуз. Энчи аскер операциягъа къатышханлагъа керекли затланы жарашдырыугъа къошумчулукъ этгенигиз ючюн а бютюн ыспас этеме. Сизни тансыкълагъанлай турлукъбуз, унутмагъыз: «Машук» – бир уллу юйюрдю, - дегенди ол.
Форумну жабылыуу Россейни Къырал байрагъыны кюню бла бир кезиуге тюшгени уа ингирге энчи магъана бергенди. Анга атап, жаш адамла байракъны Машукну башына чыгъаргъандыла, форумну жабылыуунда уа аны Комсомол талада да жайгъандыла.
Ахырында хорлагъан проектлени тамамлаугъа ахча берилгенди, битеу да 2,642 миллион сом. Форумну къураргъа себеплик этгенле уа эм тири машукчуланы белгилегендиле. Ызы бла, Данкону таурухуна кёре, шуёхлукъну, билимни бла бирликни белгиси – «Машукну жау чырагъы» – жандырылгъанды, форумгъа къатышханланы барысына да «Машук – бир уллу юйюр» деген жазыулары бла жау чыракъла да юлешиннгендиле. «Сансара» жыр айтылып, мингден аслам адам - машукчула, волонтёрла эмда форумну къурагъанла – тёгерек жыйылгъандыла. Алай бла форум адамланы жюреклеринде огъурлу ыз къоюп бошалгъанды.
Кульчаланы Зульфия.
