Къабарты-Малкъарны алимлери пластикден къалгъан-къулгъанла бютюн хайырлы болурча амал тапхандыла. Ала айтханнга кёре, ол экология жаны бла тазады эм отлукъну орунуна аламат жарайды. Ол шарт сагъынылгъан материалдан багушланы азайтыргъа, аны бла бирге иги файда тюшюрюрге да онг берликди, деп билдиредиле КъМКъУ-ну пресс-службасындан.
Экспертле айтханларыча, полимерле кюйген заманларында хауаны ууландыргъан газла чыгъадыла. Болсада аладан отлукъ къураргъа боллугъу уа бютюн къыйматлыды. Аны кезиуюнде пластик терк кюерча энчи химия кесекле хайырланырыкъдыла.
- Бюгюнлюкде бизни проектибизге ушагъан хазна жокъду. Ол, экология болумну игилендирирге себеплик этгенден сора да, къоркъуулу къалгъан-къулгъанны багъалы отлукъгъа кёчюрюрге болушады. Аллай отлукъ ракеталаны учурургъа окъуна жарарчады,- дейди математика эм керти илмула жаны бла институтну органика болмагъан эм физика кафедрасыны профессору Къочхарланы Жамал.
Бусагъатха дери пластикни кюйдюрген, бютюнда андан отлукъ къурагъан, экология жаны бла заранлыгъа саналгъанды. Болсада, сынаула кёргюзтгенлерича, полимерни энчи химия кесекле бла 450-500 градусда кюйдюрсе (атомарный кислород), андан аслам энергия чыкъгъаны тинтилгенди. Аллай кезиуде полимер терк кюеди, щёлочьла уа заранлы газла хауагъа жайылмазча этедиле.
Бусагъатда алимле лаборатор тинтиуле бардырадыла. Аланы кезиулеринде, энчи оборудование жарашдырып, промышленность халда хайырланырча амал къураллыкъды.
Магометланы Сулейман.
