1-чи лицейни аллында солуу майданда шахарны жамауаты, къонакълары, солуучулары да жыйылгъан эдиле. Байрамны къурагъан, бардыргъан да Элбрус районну Къулийланы Къайсын атлы Маданият юйюню артистлери этгендиле. Ёзденланы Танзиля, къууанчлы ингирни ача туруп, жыйылгъанлагъа байрамны тарыхындан къысха билдириу этгенди.
– Бюгюннгю кюнюбюз бирсиледен башхады! Биз белгилеген Россейни къырал байрагъыны кюню былай тохташдырылгъанды. Юч тюрсюнлю байракъ 1991 жылда Россейде политика тюрлениуле башланнгандан сора тохташдырылгъанды. 2000 жылда 25 декабрьде РФ-ни Президенти Владимир Путин «Россей Федерацияны къырал байрагъыны юсюнден» конституциялы законну къабыл кёргенди.
Андан бери юч тюрсюнлю байракъ – башында акъ, ортасында кёк, тюбюнде къызыл – Россейни къырал белгисиди. Бюгюнлюкде юч тюрсюнлю байракъ федерал, регион, жер-жерли власть органланы, сюдлени, башха къырал ведомстволаны, учрежденияланы мекямларында орнатылады. Ол Россейни хар инсаныны жюрегинде болмагъанча патриот сезим, Ата журтха сюймеклик, ёхтемлик да туудургъан байракъды, - дегенди Ёзденланы Танзиля.
Байрамны Ёзденланы Танзиля бла Джаппуланы Заира «Россейни байрагъы» деген жыр бла ачхандыла. Жырны кезиуюнде «Салам» юлгюлю ансамбльни бла «Феникс» тепсеу къауумну артистлери флешмоб салгъандыла.
Къууанчха келгенлени, Тырныауузну жамауатын алгъышлай, Элбрус районну жаш тёлю арасыны таматасы, КъМР-ни Башчысында политика жаны бла советни келечиси Этезланы Аслан юч тюрсюнлю байракъ деменгили Россейни хорламларыны бла жетишимлерини, келир заманны ышаннгылылыгъыны белгиси болгъанын чертгенди.
– Бусагъатда энчи аскер операцияда жашларыбыз Ата журтларын къоруулай, къырал байрагъыбызны хар азатлагъан эллеринде бла шахарларында орнатадыла. Ол, аланы батыр жюреклерин ёхтемликден толтура, къысха заманда Хорлам бла юйлерине къайтырларына ышандырады. Биз да аланы сау-саламат къайтырларын сакълайбыз, - дегенди ол.
Дагъыда байрамгъа Элбрус районну администрациясыны башчысы Отарланы Мухтар, жер-жерли самоуправленияны председателини орунбасары Джаппуланы Руслан, Элбрус районну жол управлениясыны таматасы Ахматланы Мурадин келип, жамауатны да алгъышлап, концертге да къарагъандыла.
Кёп тюрлю оюнла бла эришиуле да бардыргъандыла, сабийчиклени сахнагъа чакъырып. Тёрт жылчыгъы толмагъан гитче къызчыкъны уа къыралны гимнин кёлден жырлагъаны уа барын да сейирсиндиргенди, къууандыргъанды. Концертни кезиуюнде Тебердиланы Зухураны, Байсолтанланы Инараны, Ёзденланы Танзиляны, Джаппуланы Заираны бла Джаппуланы Фатиманы ариу жырлары къонакъланы кёллерин кётюргендиле.
Ызы бла таулу той башланнганды. Дискотекадан, флешмобдан, тепсеуледен сора уа, «Мени къыралымы байрагъы» деген жыр бла бошалгъанды къууанчлы ингир.
Темуккуланы Асият.
