Алиев Алий и цIэр зэрихьэу Дагъыстэным и Каспийск къалэм дэт спорт уардэунэм япэу щекIуэкIащ бэнакIуэхэм я лигэм хэтхэм я зэхьэзэхуэ. Абы щыIащ Къэбэрдей-Балъкъэрым и гъэсэн, АСА - зэзауэ зыхэт спорт лIэужьыгъуэмкIэ лигэм и зэуакIуэ, грэпплингымрэ джиу-джитсумкIэ дуней псоми УФ-ми куэдрэ япэ увыпIэхэр къыщызыхьа Багъ Алий икIи, ди гуапэ зэрыхъущи, щытекIуащ.

Ди щIалэм къыпэщIэтащ хэгъэрейхэм я бэнакIуэ, АСА лигэм зыкъыщызыгъэлъагъуэ Хирамагомедов Гаджимурад икIи зэхьэзэхуэм и бжыгъэр 10:0-у ар хигъэщIащ. Къыхэдгъэщынщи, а пщыхьэщхьэм и зэIущIэ нэхъыщхьэу щытар а щIалитIым я зэпэщIэтыныгъэращ икIи ахэр зэрызэпеуар бэнэкIэ хуитым и мардэм тетущ. Псори зэхэту зэхьэзэхуэ 18 а махуэм екIуэкIащ. 
Фигу къэдгъэкIыжынщи, Багъ Алий ММА-м щригъэкIуэкIа зэIущIэхэм щыщу 34-м щытекIуащ, 12-м къыщыхагъэщIащ, зыхэта зэхьэзэхуэхэр зэрытемыгъэкIуауэ къыщалъыта къэхъуакъым. Абы къыпэщIэта Хирамагомедовыр 16-рэ ММА-м щытекIуащ, 7 къыхагъэщIащ, абыи зэрытемыгъэкIуауэ зэIущIэр щиуха къыхуихуакъым. 
 

КЪАНШЫУЕЙ Алим.