Къабарты-Малкъарны Жамауат палатасында республикабызны миллетлерини тин-ниет хазналарын сакълауда, жаш тёлюню адет-тёрелеге юйретиуде Интернетни онгларын хайырланыуну амалларын сюзгендиле. Жыйылыугъа муниципал къуралыуланы бла жамауат биригиулени келечилери, устазла, алимле, маданият къуллукъчула да къатышхандыла.

Россейни Жамауат палатасыны келечиси Барасби Карамурзов белгилегеннге кёре, талай арт онжыллыкъда республикабызда тин-ниет хазнаны сакълау жаны бла уллу иш бардырылады. Россейни Президенти айтханыча, кёп миллетлени келечилери жашагъан Къабарты-Малкъарда миллетле эм динле аралы халла ырахатлы болурча эм маданият байламлыкъла кючленирча кёп тюрлю онгла къураладыла. Аны бла бирге бусагъатдагъы информация болумлада тёрели россейли тин-ниет байлыкъланы, тарых кертичиликни сакълаугъа да энчи эс бёлюнеди.

Алай бюгюнлюкде, Барасби Карамурзов эс бургъаныча, технологияла айныгъаны ючюн, Интернетни онглары бютюн кючленнгендиле. Биз аланы хайырланыргъа, кесибизге болушлулукъчу этерге тийишлибиз, деп къошханды ол.

Республиканы Культура министерствосуну маданият иш жаны бла бёлюмюню башчысы Инна Санова уа Интернет бла хайырланнганланы тин жаны бла айнытыуда, аланы ата журтха сюймекликде, аны аллында жууаплыкъны ангылатыуда, аны бла уа миллетлени бирикдириуде, политика эм социал тынчлыкъны сакълауда къаллай иш тамамланылгъаны бла шагъырей этгенди.

- Министерствону эм аны бойсунууунда болгъан 22 учрежденияны информация хазналары сайтларында, Телеграм, ВКонтакте, Одноклассники социал сетьледе официал «бетлеринде» ачыкъланады, алада кётюрюлген темагъа кёре суратла, материалла басмаланадыла, адамла бла да байламлыкъла жюрютюледиле. Сетьлеге жазылгъан инсанланы саны 18 мингден аслам болгъанды. Ала регионда болгъан маданият ишлени юслеринден окъуйдула, бу билдириуле жамауатха сейирдиле аланы болушлукълары бла адамла, къайда жашагъанларына къарамай, маданият жашаугъа къатышханларын сезедиле, - дегенди ол.

Интернет бла ишлеуде сынамларыны юсюнден «Биринчилени атламлары» битеуроссей къымылдауну регионда бёлюмюню башчысы Аслан Шипшев, адыг маданиятны бла эпосну интернет-майданлада жайыу бла кюрешген Илона Жилова, «Шёндюгюлю санатны усталарыны гильдиясы» жамауат биригиуню башчысы Жолабланы Мунира айтхандыла.

Ахырында жыйылыуну эсеплерин чыгъара, палатаны маданият, тин хазнаны сакълау эм асламлы информация органла жаны бла комиссиясыны келечиси, республиканы Башчысыны премиясыны «Эм иги блогер» бёлюмюнде хорлагъан Аслан Мазукабзов социал сетьле адамлагъа бир бирлери бла шуёхлукъ, байламлыкъла тохташдырыргъа болушханларын, алай анга кёре талай шартха эс бурургъа кереклисин чертгенди. «Магъаналы информацияны, жангылыкъланы да излей, адамла Интернетге киредиле. Тёрели тин-ниет хазнаны, маданиятны онлайн-майданда сакълауда биз Интернетни кючюн, аны бла бирге уа кесибизни, саулайда жамауатны жууаплылыгъын ангыларгъа керекбиз. Информация чабыуулланы ачыкълагъан эмда тыйгъан бек къыйынды, нек дегенде ала асламысында жашырын халда этиледиле, алагъа къыралланы араларында неда бир башха тюрлю чекле жокъдула. Бу тюрлю чабыуулдан къалай сакъланыргъа боллукъду? Эм алгъа, ата-бабаларыбыздан келген тин хазнаны кючю бла, аны сакълап, багъалап, сетьни юсю бла не къадар адамгъа аны юсюнден билдирип», - дегенди ол.

Айтылгъан оюмла бла байламлы жыйылгъанла жаш алимлеге, чыгъармачылыкъ бла кюрешгенлеге себеплик этерге, аланы медиа амалланы хайырланыргъа юйретирге керекди деген эсепге келгендиле, сейирлери болгъан органлагъа да эсгертиуле жарашдыргъандыла.

Кульчаланы Зульфия.