Жууукъ заманда «Жашау этерге инфраструктура» деген  миллет проектге кёре Нальчикде таза суу бла жалчытхан «Головной» водозаборну эм  сууну тазалагъан станцияны да жангыртырча ишле башланырыкъдыла. Ала юч жылны ичинде бардырыллыкъдыла эм къурулушларына  1,8 миллиард сом къоратыллыкъды, деп билдириледи КъМР-ни Къурулуш эмда жашау журт-коммунал мюлк министерствосуну пресс-службасындан. 
Бюгюнлюкде таза суу жыйылгъан «Головной» объект шахарчыланы, федерал магъаналы курортну, тёгерегинде эллени, саулай да 300 минг адамны ичер суу бла жалчытады.  
Комплекс 1962 жылда ишленнгенди. Андан бери адам санына иги кесек къошулгъаны себепли ол арт заманлада борчун тынгылы толтуралмайды. Аны хатасындан майдан башлап «Нальчик»  курорт бла тёгерегинде элле суулары жетмей къыйналадыла. Сёз ючюн, проектге кёре ол 700 минг кубометр суу бла жалчытыргъа керек эсе, бюгюнлюкде жаланда 70-80 минг кубометр береди. Аны бла байламлы жайда  сууну  график бла берирге тюшеди.  
Проект жашауда бардырылса, таза суу бла   эллени толусунлай жалчытырыкъды. Аны бла бирге курортну айнырына себеплик этерикди – къонакъ юйлени, санаторийлени эм башха объектлени да санына танг кесек къошуллукъду.  
Эсге сала айтсакъ, быйыл республикада жашагъанланы  таза суу бла тынгылы жалчытыр ючюн  20 объект ишленирикди. Аладан 15-си быйылны аягъына, къалгъанлары уа  келир жылны ахырына хайырланыргъа берилликдиле.