Бахъсэн район сымаджэщым и поликлиникэ №-1-м зэгъэпэщыжыныгъэхэр зэрыщрагъэкIуэкIар зригъэлъэгъуащ КъБР-м и Iэтащхьэ КIуэкIуэ Казбек. IуэхущIапIэм къегъэщIылIа щIыпIэр зэIузэпэщ ящI мы зэманым.
Iуэхур зэрекIуэкIам, лэжьыгъэр зэрызэтраублэжам щIыналъэм и Iэтащхьэр щыгъуазэ хуащIащ КъБР-м узыншагъэр хъумэнымкIэ и министр Къалэбатэ Рустамрэ Бахъсэн район сымаджэщым и дохутыр нэхъыщхьэ Ещтрэч Мурат-рэ.
Лэжьэгъуэ махуэм къриубыдэу IуэхущIапIэм дэIэпыкъуныгъэ щагъуэтыфынущ цIыху 750-м. Абы къегъэбыдылIащ Бахъсэн къалэмрэ районым и къуажэхэмрэ щыпсэу цIыху мин 60-м щIигъу.
КIуэкIуэ Казбек епсэлъащ поликлиникэм и лэжьакIуэхэми абы къекIуалIэхэми, къыхигъэщащ иджырей мардэхэм тету зи лэжьыгъэр зэтраублэжа поликлиникэр псоми я тыншыпIэм хуэщIауэ зэрыщытыр.
Лэжьыгъэр ирагъэкIуэкIащ «Узыншагъэр хъумэн» лъэпкъ проектым хыхьэу. Метр зэбгъузэнатIэ 2400-рэ зыубыд унэр и щIыбкIи, и кIуэцIкIи къагъэщIэрэщIэжащ, инженер хуэIухуэщIэхэр яхъуэжащ, бжэхэр, щхьэгъубжэхэр, лифтыр щIэкIэ зэрахъуэкIащ. ЦIыхухэм къатемыхьэлъэу лэжьыгъэр къызэгъэпэщауэ щытын папщIэ, IуэхущIапIэм и щIыхьэпIэ-щIэкIыпIэхэр зэхагъэщхьэхукIащ - плъыржьэрыгъэ зиIэ сымаджэхэр бжэ щхьэхуэкIэ зекIуэнущ.
Поликлиникэр фIагъышхуэ зиIэ иджырей медицинэ IэмэпсымэхэмкIэ къызэрагъэпэщащ. Абыхэм яхэтщ УЗИ аппаратыр, бжыгъэр зи лъабжьэ маммографыр, рентгеныр, эндоскоп Iэмэпсы-мэр. Абыхэм Iэмал къаритынущ цIыхухэм я узыншагъэр тэмэму къэпщыта хъунымкIэ, апхуэдэ щIыкIэкIи узыфэхэр и чэзум къахутэфы-нущ.
