Алгъаракълада Долинскде хычинни фестивали-конкурсу къууанчлы ётгенди. Бу кюнледе уа адамла бир бирге тюбегенлеринде, социал сетьледе да аны юсюнден кеслерини оюмларын айтадыла, суратла да саладыла. Аланы араларында бюсюрегенле, бюсюремегенле да бардыла, алай жаратханла, ёхтемленнгенле да бютюн кёп болгъанлары къууандырады.
Мен а эрттенликде барып, ингирликде байрамны ахырына дери тургъанма. Аны себепли хычинлени фестивали-чемпионаты кёплени эслеринде къалырча къуралгъанды, деп айталлыкъма. Андан сора да, аны бир заманда да болмагъанча кёп адам (тергеулеге кёре, 26 мингден аслам) жокълагъанды.
Байрамдан сора мен Хасанияны администрациясыны башчысы Азаматланы Къайсын бла тюбешип, ушакъ этгенме.
- Къайсын, бу биринчи фестиваль-чемпионат болгъаны себепли, чурумсуз да ётген болмаз?
- Чемпионатдан сора, биз, къурау комитетни къаууму, администрацияда жыйылып, бир бирге тынгылагъанбыз, кемчиликлени, жетишимлени да сюзгенбиз. Бу ишни къураугъа жаланда юч ай бар эди. Аллай бир заманны ичинде къурау комитетни, эллилерибизни быллай магъаналы жумушну тындырыргъа къолларындан келген эсе, ала жаланда махтаугъа тийишлидиле.
- Аллай магъаналы байрамны къурагъан алай тынч тюйюлдю, болсада жетишалгъансыз.
- Кечеле бла окъуна ишлерге тюшгенди. Эки кюн алгъа сахна орнатылгъанды, хансла чалыннгандыла, стадионну ичи, тёгереги да тазаланнганды. Байрым кюн а чатырла орнатылгъандыла. Шабат кюн а, кесинг кёргенсе, къурау комитетни къаууму, эрттенликде-эртте келип, кюнню узунуна бир минутну да олтуруп солумагъандыла, чапханлай айланнгандыла. Аланы стадионну хар къалайында да кёрюрге боллукъ эди. Сау болсунла, къызла, жашла да арыгъанбыз, къызыуду, ачбыз, суусапбыз деп тарыкъмагъандыла.
Абаданла угъай да, школчу жашчыкъла, къызчыкъла да хар айтылгъан жумушну этгенлей, чапханлай айланнгандыла. Барысына да бек ыразыма.
- Кёпле жапмала къураргъа, келгенле олтурурча шинтикле салыргъа, суусап сууладан кёбюрек келтирилсе иги боллукъ эди, дейдиле.
- Биз аланы, башха кемчиликлени да билгенбиз, кёргенбиз, мындан ары аллай ишлерибизде къайтармазгъа кюреширикбиз. «Къош да бара-бара тюзеледи», – дегенлей, мындан сора боллукъ къууанчлы ишлерибиз да тап къуралырла, деген акъылдама.
Сора айтырыгъым: суусап сууланы «Бабугент» предприятие келтирген эди. Ала кёп эдиле. Жаланда адамланы иги кесеги аланы къайдан алыргъа билмей къалгъандыла. Аны да эсге алгъанбыз.
Бизге башха регионладан, ол санда Дондагъы Ростовдан, Шимал Осетия-Алания Республикадан, Краснодар, Ставрополь крайладан да къонакъла келирге, чемпионатха къатышыргъа ыразылыкъларын билдирген эдиле. Алай, ахырына жетгенде, бир къауум чырмаула чыгъып, келалмай къалгъандыла. Энди келир жыл бардырыллыкъ фестивальгъа хазырланыр заманыбыз кёп болур, аны географиясы да кенгерир, деп ышанабыз.
- Фестивальны кезиуюнде сахнадан сёлешгенингде, эндиги чемпионат да Хасанияда бардырыллыгъын айтханса. Ол къалайда ётерикди, бу жолча, кёп адам сыйынырча жери бармыды элни?
- Нальчик черекни боюнунда неда лыжала бла учуучу талада. Анда жер эркинди, кюн бетлиди, тёгереги да ариуду. Сора таза, тау хауа, шаудан суула да бардыла.
Нальчик сууну боюнунда болса да, жер табыллыкъды. Дагъыда къатлап айтыргъа сюеме: Хасаниячы волонтёр жашчыкъла бла къызчыкъла фестивальда кёп иш тамамлагъандыла. Шешала бла гара сууланы келгенлеге юлешгендиле, холодильникге салып, сууукъ этгендиле, къалайда да тизгинлик сакъланырына къайгъыргъандыла. Кюн иссиде ала къазауатда ишлегендиле, бек сау болсунла. Аллай жашланы бла къызланы ёсдюрген ата-аналагъа да жюрегими теренинден ыспас этеме, газетни юсю къурау комитетни къауумуну атындан, энчи кесим да алагъа жюрек ыразылыгъымы билдиреме.
Холаланы Марзият.
Суратда: Азаматланы Къайсын сёлешеди.
