Къэбэрдей-Балъкъэрым щы­зэхуащIыжащ хамэ къэ­ралхэм къикIа ди лъэп­къэгъухэмрэ ди щIыналъэм щыщхэмрэ я лагерыр. Ар къызэрагъэпэщат КъБР-м Лъэпкъ Iуэхухэмрэ жылагъуэ проектхэмкIэ и министерст­вэмрэ Дунейпсо Адыгэ Ха­сэмрэ.

«Синдика» хьэщIэщым ­щы­зэхуащIыжащ хамэ къэ­рал­хэмрэ Урысейм и щIыналъэ­хэмрэ щыщ ди лъэпкъэгъу сабийхэмрэ щIалэгъуалэмрэ я лагерыр. 
Хабзэ хъуауэ, Налшык мы Iуэхур гъэ къэс къыщызэрагъэ­пэщ. Хамэ хэкухэм щыпсэу ди лъэпкъэгъухэм яхудиIэ зэпы­щIэ­ныгъэм зрагъэужьын, нэхъри ягъэбыдэн, адыгэ щэнхабзэмрэ тхыдэмрэ щIэблэр хагъэгъуэзэн папщIэ. Iуэху дахэр ирагъэжьащ илъэс пщыкIутIкIэ узэIэбэкIыжмэ. Абы къокIуалIэ Тыркум, Сирием, Иорданием, Абхъазым, Осетие Ищхъэрэ - Аланием щыщ ди лъэпкъэгъу­хэр.
Къэбэрдей-Балъкъэрым зэ­ры­щыIа пIалъэм къриубыдэу хьэ­щIэхэр хуагъэзащ ди щIы­-налъэм, жылагъуэ, щIэныгъэ, творческэ зэгухьэныгъэхэм я унафэщIхэм, декоративно-прикладной гъуазджэмкIэ мастер-классхэм я зэфIэкI щеплъы­жащ, Къэбэрдей-Балъкъэрым щыпсэу лъэпкъхэм я тхыдэмрэ щэнхабзэмрэ теухуа дерсхэм едэIуащ, музейхэмрэ щIыпIэ дахэхэмрэ зыщрагъэп­лъы­хьащ.
- Ди лагерыр и кIэм нэблэ­-гъащ. Хэкужьым щывгъэкIуа ­махуэхэм къриубыдэу лIэ­щIы­гъуэкIэрэ щыIэ зэпыщIэны­-гъэр зыхэфщIауэ, щIыналъэм щып­сэу лъэпкъхэр зыхуэдэм­-рэ абы­хэм я псэукIэмрэ зы­-­щыв­гъэ­гъуэзауэ сыщогугъ. Нэ­хъыщ­хьэ­ращи, Урысей Федерацэм ис лъэпкъхэр зэгуры­-Iуэу, мамыру зэрызэдэпсэур флъэгъуащ. Иджыри къы­тев­гъэзэжу ди ­республикэм фы­щыхьэщIэну ди гуапэщ! - жиIащ КъБР-м лъэпкъ Iуэхухэмрэ жы­лагъуэ проектхэмкIэ и министрым и къалэнхэр зыгъэзащIэ Гергоков Джамбулэт. 
Дунейпсо Адыгэ Хасэм и тхьэмадэ Сэхъурокъуэ Хьэутий фIэхъус гуапэ ярихащ хьэщIэ­хэм. Абы фIыщIэ яхуищIащ ­КъБР-м и Iэтащхьэмрэ Правительствэмрэ, Iуэхур къы­зэ­зы­гъэпэща министерст­вэм. 
- Зы лъэныкъуэкIэ ди гуапэщ зэ­маныр гукъинэжу икIи щхьэ­пэу зэрыдгъэкIуар, ауэ дыще­жьэжыну пIалъэр къы­зэ­ры­блэгъар ди жагъуэщ. Я адэ-анэм я фIыгъэкIэ щIэблэр щIапIыкI зыщыщ лъэпкъым и тхыдэм, - жиIащ Тыркум къикIа гупым я унафэщI Гъуэгуно­къуэ Лизэ. - Апхуэдиз ­гулъытэ зы­гъуэта, адыгэ щэн­хабзэмрэ тхыдэмрэ зыщIэзыша щIалэ­гъуалэр иджы нэгъуэщI ­хъуауэ гъуэгу дытехьэжынущ. Хэку­жьым къагъэзэжу щылэ­жьэну, щIэныгъэ щызрагъэ­гъуэ­тыну иджы щIохъуэпс ахэр. Лагерыр къызэзыгъэпэщахэм фIы­щIэ яхудощI! Абы хэта псо­ри зэдэлъхузэшыпхъу зэхуэхъуащи, дяпэкIэ зэхуэ­зэ­шынущ. 
Адыгэ хабзэр хъумэнымрэ ­къэгъэщIэрэщIэжынымкIэ бзы­лъ­хугъэхэм я «Лашын» жылагъуэ зэгухьэныгъэм и ­президент Къущхьэ Аксанэ ­дэтхэнэ хьэ­щIэми хуэупсащ «Адыгэ шхы­ныгъуэхэм я хъу­гъуэфIыгъуэ» серием хыхьэу къыдигъэкIа «Си анэм и пщэ­фIэкIэр» и тхылъымкIэ.
- Илъэсым щIигъукIэ тхы­лъыр дгъэхьэзыращ. Хамэ къэралхэм щыпсэу ди лъэп­къэгъухэм яIэ­рыдгъэхьэн пап­щIэ ар инджы­лызыбзэрэ тыркубзэкIэ зэддзэ­кIащ. Нью-Джерсирэ Тыркумрэ едгъэшащ тхылъхэр. ЩIалэ­гъуалэ лагерым и хъыбар щы­зэхэсхым, дэтхэнэ ди хьэщIэми си тхы­лъыр тыгъэ хуэсщIыну гу­пыж сщIащ, - жиIащ Къущхьэ Аксанэ. 
Зэхыхьэм къыщыпсэлъащ ла­герым щыIа гупхэм ящыщ­хэр. Абыхэм жаIащ зыхэта Iуэхур ­къазэрыщыхъуар, икIи бысым­хэм фIыщIэ хуащIащ. Лагерым щыIа дэтхэнэми ­иратащ КъБР-м Лъэпкъ Iуэху­хэмрэ жылагъуэ проектхэмкIэ  и министерствэм и щIыхь тхылъыр. 
Пшыхьыр ягъэдэхащ «Ка­бардинка» къэрал академи­ческэ къэфакIуэ ансамблым, КъБР-м и Музыкэ театрым и уэрэджыIа­кIуэ­хэу Хьэкъул ­Оксанэ, Жубоев Жамбулэт, Дэгу Каринэ, КъБР-м щIыхь зиIэ и артист ДыщэкI Артур сымэ.
 

ТЕКIУЖЬ Заретэ.