НэхъыжьыфI здэщыIэм нэхъыщIэфIи щыIэщ, жаIэ. Iущыгъэм и мыхьэнэр нэхъри зыхыбощIэ, къыдэкIуэтей щIэблэм яхуэфащэ гулъытэм дуней и пIалъэр къэзыщIахэм щыщамыгъащIэм, абыхэм яхуэгъэзауэ ятелъ хьэкъыр щагъэзащIэм деж. Нарткъалэ и курыкупсэм ит жыг хадэр цIыхухэм я кIуапIэщ, мыбдеж пщыхьэщхьэкIэрэ сабий зиIэ унагъуэхэр къекIуалIэурэ я нэгу зрагъэужь, зыщагъэпсэху. «Пэрытхэм я зэщIэхъееныгъэм» КъБР-м щиIэ щIыналъэ къудамэм хэтхэмрэ УФ-м ЩытыкIэ къызэрымыкIуэхэмкIэ и министерствэм и республикэ къудамэмрэ зэщIыгъуу нэхъыжьми нэхъыщIэми я хьэкъхэри къэзылъытэ Iуэху щхьэпэ щрагъэкIуэкIащ иджыблагъэ.
«Шынагъэ зыхэмылъ си зыгъэпсэхугъуэ махуэхэр» зыфIаща пэхуэщIэм ипкъ иткIэ, сабийхэм шынагъэ ящIапхъэхэмрэ зыщагъэгъупщэ мыхъунухэмрэ ягу къагъэкIыжынырщ жэрдэмщIакIуэхэм къалэн нэхъыщхьэ зыщащIыжар. Абы теухуауэ ягъэхьэзыра программэр Iуэхугъуэ зэмылIэужьыгъуэхэмкIэ гъэнщIат. Абы хиубыдэрт упщIэрэ жэуапу зэхэт джэгукIэхэр, мафIэр гъэункIыфIыным пыщIа Iуэхугъуэхэр къызэщIэзыубыдэ спорт зэхьэзэхуэхэр, асфальтым тращIыхь сурэт зэпеуэхэр, нэгъуэщI куэди.
Зи ныбжьыр еджапIэ кIуэгъуэм нэмыса цIыкIухэр сурэт щIыным нэхъ къыхэщами, нэхъыжьыIуэхэми я жыджэрагъыр, псынщIагъыр, жанагъыр спорт зэхьэзэхуэхэмкIэ ягъэунэхуащ.
Iуэхугъуэм курых хуэхъуар мафIэсгъэункIыфIхэм я лэжьыгъэм хэлъ щхьэхуэныгъэхэр ягъэлъагъуэу утыку кърахьа гъэлъэгъуэныгъэхэрщ. Апхуэдэу Нарткъалэ дэт 5-нэ мафIэсгъэункIыфI IуэхущIапIэм и лэжьакIуэхэм цIыкIухэр щагъэгъуэзащ IэнатIэм пэрытхэм ящыгъ щыгъынхэр зыхуэдэр, тепсэлъыхьащ я фащэм хэлъ пкъыгъуэхэм я мыхьэнэм, ирагъэлъэгъуащ мафIэ къызыщIэна щIыпIэр бгъэункIыфIын щхьэкIэ, япэщIыкIэ щIэн хуейхэр. Псом хуэмыдэу цIыкIухэм гунэс ящыхъуащ а IэщIагъэм ирилажьэхэм я фащэмрэ Iэмэпсымэхэмрэ зэпаплъыхьыну Iэмал зэраIар.
- Мыпхуэдэ пэхуэщIэхэм мыхьэнэшхуэ ядот. Дэ къыдгуроIуэ зыгъэпсэхугъуэ зэманыр цIыкIухэм гукъыдэж ящыхъун IуэхугъуэхэмкIэ гъэнщIын зэрыхуейр, ауэ зэманыр апхуэдизкIэ псынщIэу макIуэ, лэжьапIэ IэнатIэ Iутхэм я къалэнхэм зэщIеIулIэри, адэ-анэр а псом щыхунэмыс къохъу, уеблэмэ къызыфIэмыIуэхуи къахокI. Нэхъыжьхэращ щIэблэр зыущиин хуейр. А къалэныр зым деж къыщыщIэмэ, апхуэдэ Iэмал зиIэ адрейм ар Iэпэдэгъэлэл ищI хъунукъым. Ди нэхъыжьыжьхэр апхуэдэущ зэрыщытар. Хамэ сабий щыIэтэкъым, хьэблэм дэс цIыкIухэр псоми я зэхуэдэт. Дэри сабий гъэсэныгъэм щыщу а бгъэдыхьэкIэр тфIэкъабылщи, IэщIыб дымыщIыныр игъуэу къыдолъытэ. ЦIыкIухэм щIэныгъэм и закъуэкъым ябгъэдэтлъхьэр, атIэ къагурыдогъаIуэ цIыху гъащIэм мыхьэнэшхуэ зэриIэр, абы нэхъ лъапIэ зэрыщымыIэр, щытыкIэ къызэрымыкIуэ ихуар мыгужьейуэ, абы къызэрикIын Iэмал акъыл бзыгъэкIэ къилъыхъуэу щытын зэрыхуейр, - жаIэ къызэгъэпэщакIуэхэм.
Iуэхугъуэ дахэр сабийхэмрэ жэрдэмщIакIуэхэмрэ зэхэту траха сурэтымкIэ яухащ, цIыкIухэми а псор зылъэгъуа адэ-анэхэми гукъыдэж къариту, апхуэдэ пэхуэщIэхэмкIэ дяпэкIи ягъэгуфIэну зэращыгугъыр жаIэу.
ШУРДЫМ Динэ.
