2025 - 2026 гъэхэм бгы-лыжэ лъэхъэнэм щIидзэным ипэ къихуэу «Iуащхьэмахуэ» курортым къуршыщхьэм удэзышей кIапсэ гъуэгум и ски-пассхэр (абонементхэр) ищэн щIидзащ. Дызэрыт илъэсым шыщхьэуIум и 31 пщIондэ абыхэм я уа-сэм процент 35-м нэблагъэкIэ кIэрагъэхунущ.
«Ски-пассхэм я уасэм и процент 35-р кIэрыгъэхуауэ тщэн щIэддзащ. Ски-пассымрэ чэзум ухэмыту къуршыщхьэм занщIэу удэкIуеину хуит узыщI абонементымрэ къыщыпщэху хъунур ди сайтым и закъуэщ. Бгы-лыжэ къэжыхьыгъуэ зэманыр, илъэсыщIэ зыгъэпсэхугъуэ махуэхэри хэту, икIыхукIэ абыхэм къару яIэнущ», - щыжаIащ курортым и администрацэм.
Кавказ.РФ-м и пресс-IуэхущIапIэм къызэритамкIи, шыщхьэIум и 31 пщIондэ ски-пассхэр къэзыщэхухэм сом мин 20 фейдэ къахуищIынущ (и уасэм и процент 30-р). Ски-пассымрэ абонементымрэ зэгъусэу къэзыщтэхэм сом мин 42-рэ къахудэхуэнущ.
«Сабийхэм папщIэ, я ныбжькIэ илъэси 6-м къыщыщIэдзауэ 13-м нэсыху, ски-пассхэм я уасэхэми шыщхьэуIум и 31 пщIондэ кIэрагъэхуауэ къращэнущ икIи сом мин 12-кIэ ахэр нэхъ пуду щытынущ е сом мин 25-кIэ нэхъ мащIэнущ - ски-пассым щIыгъуу чэзум ухэмыту къуршыщхьэм удэкIуеину хуит узыщI абонементри къащэхуу щытмэ», - щыжаIащ Кавказ.РФ-м.
Хабзэ зэрыхъуауэ, Iуащхьэмахуэ джабэ и нэкIухэм лыжэкIэ къыщажыхьын щыщIадзэр щэкIуэгъуэм и кIэхэмрэ дыгъэгъазэм ипэ махуэхэмрэ ирихьэлIэущ, щыщагъэтыжыр гъэма-хуэм икухэрщ. А зэманым къриубыдэу туристхэм Iэмал яIэщ километр 23-рэ зи кIыхьагъ лыжэ гъуэгу зэхуэмыдэхэм къыщажыхьыну, Урысейм нэхъ лъагэ дыдэу къуршыщхьэм удэзышей кIапсэ гъуэгумкIэ, метр 3847-рэ зи лъагагъ джабэм дэкIуеину.
Илъэс блэкIар къатщтэмэ, Iуащхьэмахуэ и джа-бэ нэкIухэм туристхэм лыжэхэмкIэ къыщажыхьащ махуэ 224-кIэ - бадзэуэгъуэм и 6-м нэсыху. А зэманым къриубыдэуи цIыху мелуан ныкъуэм щIигъу абы щыIащ.
Фыщыдгъэгъуэзэнщи, «Iуащхьэмахуэ» курортым балигъхэм щхьэкIэ и ски-пассымрэ чэзум ухэмыту къуршыщхьэм удэкIыну хуит узыщI абонементымрэ зэхэту сом мини 110-рэ я уасэщ, сабийхэм яйм – сом мин 75-рэ икIи щIымахуэ къэжыхьыгъуэр икIыху абыхэм къару яIэнущ.
АЛЫДЖЫКЪУЭ
Руслан.
