Дапщэщи хуэдэу, 2025 гъэмахуэ зыгъэпсэхугъуэри ди щIыналъэм ныкъусаныгъэншэу къыщызэгъэпэщащ. Сабийхэмрэ ныбжьыщIэхэмрэ я нэгу зегъэужьыным, я узыншагъэр егъэфIэ­кIуэ­ным, ябгъэдэлъ щIэныгъэмрэ зэ­фIэ­кI­-
хэмрэ лъэныкъуэ куэдкIэ хагъэхъуэным ехьэлIа лэжьыгъэхэр мы зэманми щокIуэкI ди республикэм, 2025 - 2026 гъэ еджэгъуэщIэр яублэным тхьэмахуитI иримыкъу фIэкIа къэмынами. Лъэхъэнэр шынагъуэншэу икIи къызыхуэтыншэу екIуэкIыным гулъытэшхуэ хуэзыщI унафэщIхэм я мурадщ гъэмахуэ дахэм и дэтхэнэ махуэри яфI зыхэлъ Iуэхугъуэ­хэмкIэ гъэнщIауэ щIэблэм кърагъэгъэсэбэпыну. 

ГъэщIэгъуэну, купщIафIэу, шына­гъуэншэу къызэгъэпэща апхуэдэ лэжьыгъэхэм къызэщIаубыдакIэщ илъэси 6,5-м къыщыщIэдзауэ 15-м нэс зи ныбжь сабийрэ ныбжьыщIэу мини 6,5-м щIигъу. Дауи, гулъытэ щхьэхуэ ялъысащ гъащIэм щытыкIэ гугъу щихуа унагъуэхэм щапI сабийхэм, ди къэралым гъунэгъу щIыналъэм щригъэкIуэкI дзэ Iуэху хэхам хэт ди лъа­хэгъухэм я бынхэм. 
Псори зэхэту къапщтэмэ, Къэбэрдей-Балъкъэрым щолажьэ сабийхэм ­зыщагъэпсэху, я узыншагъэр щрагъэфIакIуэ IуэхущIапIэ зэмылIэужьыгъуэу 36-рэ. Абыхэм ящыщ дэтхэнэри къызэгъэпэщащ зыхуей-зыхуэфI псомкIи: егъэджакIуэхэмрэ гъэсакIуэхэмкIэ, медицинэ дэIэпыкъуныгъэр, шынагъуэншагъэр къы­зэзыгъэпэщ IэщIагъэлIхэмкIэ, унэ­тIакIуэхэмрэ сабий гупхэм я пашэхэмкIэ. Вожатэхэр зыгъэп­сэхупIэхэм тэрэзу щылэжьэным хуэгъэ­хьэзырыным я зэ­фIэкI халъхьащ «Пэрытхэм я зэщIэхъееныгъэ» урысейпсо жыла­гъуэ зэгухьэныгъэм КъБР-м щиIэ къудамэм (унафэщIыр Шыпш Аслъэнщ) и Iэ­щIагъэлIхэм.
Хабзэ зэрыхъуауэ, СВО-м зэрыщIидзэ лъандэрэ ди республикэм зыщагъэпсэху гъунэгъу щIыналъэхэм щыщ сабийхэми. «Антарес» сабий центрым, Iуащхьэмахуэ лъапэ щыIэ сабий зыгъэпсэхупIэхэм мы гъэмахуэм щыIэщ Херсон областым хыхьэ  Голопристанскэ, Скадовской районхэм, Донецк, Луганск цIыхубэ республикэхэм къикIа ныбжьыщIэхэр. А IуэхущIапIэхэм я унафэщIхэр, лэжьакIуэхэр йолIалIэ ди щIыпIэм зэрыщыIэну махуэхэр а сабий­-  хэм купщIафIэу, гукъинэжу, Iуэхугъуэ хьэлэмэт куэдкIэ гъэнщIауэ зэрырагъэ­кIуэкIыным. 
Мы махуэхэм ди республикэм зыгъэпсэ­хуакIуэ къэкIуащ сабии 141-рэ. Псори зэхэту къапщтэмэ, гъунэгъу къуэш щIыналъэхэм къикIа сабийрэ ныбжьыщIэу 1100-м щIигъум ди щIыпIэм зыщагъэпсэ­хунущ мы гъэмахуэм къриубыдэу. 
Сабийхэм я узыншагъэр щрагъэфIакIуэ икIи зыщагъэпсэху «Лэгъупыкъу» социальнэ центрми ди лъахэм щыщ цIыкIухэм нэмыщI, нэгъуэщI щIыпIэхэми къикIа ныбжьыщIэхэри къокIуэ. Апхуэдэу а IуэхущIапIэм мы махуэхэм щыIэну Iэмал хъарзынэ къахукъуэкIащ Ненецкэ автоном округым щыщ сабий 53-м, абыхэм якIэлъыплъ балигъ­хэр я гъусэу. 
ЦIыкIухэм ящыщ дэтхэнэми, зыщыщ унагъуэмрэ къыздикIа щIыпIэмрэ емылъытауэ, зэманыр хьэлэмэту ягъэкIуэным що­гугъу зыгъэпсэхупIэ псоми. УнэтIакIуэхэмрэ вожатэхэмрэ я нэIэм щIэту, ахэр хэтщ джэгукIэ зэмылIэужьыгъуэхэм, зэпеуэ, зэIущIэ хьэлэмэтхэм, ди республикэм и щIыпIэ дахэхэм я нэгу зыщрагъэужь
А псори къызэщIэзыубыдэ лъэхъэнэ хьэлэмэтыр, шэч хэмылъу, сабийхэми ныбжьыщIэхэми фIыкIэ куэдрэ ягу къэкIы­жынущ. 
ТАМБИЙ  Линэ.