«Урысей зэкъуэт» партым цIыхубэм защIэгъэкъуэ­ным­кIэ Къэбэрдей-Балъ­къэ­рым щиIэ штабым шыщхьэуIум и 19-м псапэ зыпылъ Iуэху щекIуэкIащ, «Сабийр еджапIэм хуэгъэ­хьэзыр» урысейпсо жэрдэ­мым и Iыхьэу. Ар къызэрагъэпэщащ партым и Налшык къалэ щIыпIэ къудамэм и къарукIэ. 

ПСАПАЩiЭМ хэтащ Налшык къалэ округым и щIыпIэ администрацэм и Iэтащхьэ, «Урысей зэкъуэт» партым цIыхубэм защIэгъэкъуэнымкIэ Къэбэрдей-Балъкъэрым щиIэ штабым и унафэщI ­Ахъуэхъу Таймураз, КъБР-м и Парламентым ЕгъэджэныгъэмкIэ, щIэ­ныгъэмкIэ, физическэ щэнхабзэмкIэ, спортымрэ щIалэгъуалэм я IуэхухэмкIэ и комитетым и унафэщI, «Иджырей школ» парт Iуэхур ди щIыналъэм щызыубзыху Емуз Нинэ, ­КъБР-м и Парламентым ЩэнхабзэмкIэ, жы­лагъуэм зегъэужьынымрэ хъыбаре­гъащIэ политикэмкIэ и комитетым и унафэщI Те­куев Амурбий, «Урысей зэ­къуэт» партым и Къэбэрдей-Балъкъэр щIыналъэ къудамэм и секретарым и къуэдзэ Парафилов Дмитрий, КъБР-м и Парламентым и депутатхэу Шевчук Германрэ (СВО-м и ветеранщ) Беспаловэ На­талье­­рэ. Школым къыща­гъэ­сэбэпыну хьэпшыпхэмрэ порт­фелхэмрэ иратащ зи узыншагъэм сэкъат иIэ сабийхэмрэ дзэ Iуэху хэхам и ветеранхэм я бынхэмрэ. Ап­хуэ­дэу ягъэгуфIащ сабий 24-рэ.
Емуз Нинэ къыщыпсалъэм щIэупщIащ нэхъ лъапIэр саугъэтыр къуатынра хьэмэ ­зыгуэрым ар ептынра, жиIэри. Сабийхэм зы жьэу жаIащ: «Уэ езым ептынращ». 
- «Урысей зэкъуэт» партым и лIыкIуэхэр дэри аращ ды­зэреплъыр - гуапагъэ щып­щIэ­кIэ, зыгуэрым тыгъэ щы­хуэп­шийкIэ зыхэпщIэ гуры­щIэхэр нэхъыбэщ, гухэхъуэ­гъуэ уогъуэт, - жиIащ Емузым. - ИкъукIэ сабий дыгъэхэр нобэ къытхуеблэгъащ, шэч къытесхьэркъым дэтхэнэри школ щIэтIысхьэжыгъуэм зэрыхуэпIащIэм. Курыт еджапIэр ар гъащIэм ухуэзыгъэ­хьэзыр лъэмыжщ, абдежщ мыхьэнэ зиIэ Iуэхухэр къы­щыпщIэр. ЖысIэнуращи, ар цIыху гъащIэмкIэ мыхьэнэшхуэ зиIэ пIалъэщ. Нобэ фхуэтщIа тыгъэхэр дигуми ди псэми къабгъэдэкIыу фэттащи, гукъинэж фщыхъуну ди гугъэщ. 
Депутатым езыми зы хъы­джэбз цIыкIу IэпщэхъукIэ къыхуэупсащ, и IэкIэ ищIыжауэ. 
- Гъэ еджэгъуэщIэм мыгувэу щIидзэжынущ. Шэч къытетхьэркъым фи егъэджа­кIуэхэмрэ ныбжьэгъухэмрэ фазэрыхуэзэшам. Нобэ хьэп­шыпыщIэ фхуэдгъэ­хьэ­зыра­хэр къыфхуэсэбэпыну, ехъу­лIэныгъэшхуэхэр къыфху­дэ­кIуэну ди гуапэщ. Фи адэ-анэхэр фымыгъэгумэщI, фи зэфIэкIхэм ахэр иригушхуэу феджэну сынывохъуэхъу, - яжриIащ сабийхэм Ахъуэхъу Таймураз.
Мы Iуэхур республикэм зэ­рыщрагъэкIуэкIымрэ абы ­кърикIуамрэ тедгъэпсэлъы­хьыну зыхуэдгъэзащ «Сабийр еджапIэм хуэгъэхьэзыр» лэ­жьыгъэр къызэзыгъэпэщ Абазэ Хьэсэнбий. Абы къы­джиIащ: «Сабийр еджапIэм хуэгъэхьэзыр» Iуэхур илъэсий хъуауэ йокIуэкI, иужьрей илъэсищым ар «Урысей зэ­къуэт» партым и щIыналъэ жылагъуэ егъэблэгъапIэм къыщызыдогъэпэщ. Зэрыгу­рыIуэгъуэщи, мыр зыхуэгъэзар гугъуехь пэщIэхуа уна­гъуэхэм, хуэмыщIахэм, бынунагъуэшхуэхэм къыщыхъу сабийхэмрэ ныкъуэдыкъуэхэм­-
рэ дадэIэпыкъунырщ. Псом хуэ­мыдэу япэу гулъытэ зы­хуэт­щIыр иужьрейхэращ. Абы къыкIэлъыкIуэу защIыдогъакъуэ дзэ Iуэху хэхам къулыкъу щызыщIэхэм я бынхэм. Еща­нэу - хуэмыщIауэ псэу уна­гъуэхэм. Къэбгъэлъагъуэмэ, ди гъунэгъу республикэхэм къащхьэщыкIыу (абыхэм зэ­рытхэ Iэмэпсымэхэмрэ тет­радхэмрэ ирату аращ), дэ нэхъ тфIэкъабылу портфелхэри щIыдгъуащ дазэры­хуэупсэм. Ар зэттхэм я ныбжьри къэтлъытэу къыхыдох. Дызэрыт илъэсым портфелрэ школ хьэпшыпу абы щIыгъу­хэмрэ зэгъусэу 200-м щIигъу дгъэхьэзыращ, абы и ны­къуэр зыхуэфащэхэм яIэрыдгъэхьэжагъэххэщ. Нэхъ ипэ­IуэкIэ мыпхуэдэ ди зэхыхьэм къеблэгъат УФ-м и Къэрал Думэм и депутат Родинэ Викторие. Къэбэрдей-Балъкъэрым щыщ куэдым я гуащIэ халъхьэ псапэ щIэнми, абы дыщогуфIыкI. Псалъэм пап­щIэ, КъБР-м и Iэтащхьэм и унафэкIэ, республикэм я нэIэ щытетщ дзэ Iуэху хэхам хэтхэм я унагъуэхэм. Къыхэгъэщыпхъэщ щIалэгъуалэ зэгухьэныгъэхэри мыпхуэдэ Iуэхухэм зэрегугъур. Ди къарур псоми зы Iуэху щхьэпэм етхьэлIэмэ, абы щыгъуэщ ди Iэужьым и фIагъыр къыщы­нэIуэнур. Шэч хэмылъу, мы Iуэхур щэхуу къызэбгъэпэщу, сабийхэм я тыгъэхэр яхуэдгуэшыж хъунут. Ауэ хъыбарегъащIэ IуэхущIапIэхэр къы­щIедгъэблэгъами щхьэусыгъуэ иIэщ. Дэ дыхуейщ  мыпхуэдэ псапэ Iуэху пщIэ зэрыхъунур ялъэгъуну, дэIэ­пыкъуэгъу хъуну хуейхэм къахэхъуэн папщIэ. ЗэрыфщIэщи, адыгэхэми балъкъэрхэми ижь-ижьыж лъандэрэ хабзэу къыддокIуэкI хуэныкъуэм зы­щIэгъэкъуэнымрэ гъунэгъум дэIэпыкъунымрэ. Дыщогугъ дяпэкIи абы дытетыну».

БАГЪЭТЫР  Луизэ.
Сурэтыр
Къарей  Элинэ  трихащ.