Быйыл жылны башындан бери кёк отлукъ ызлагъа эркинликсиз къошулгъан иги кесек шарт ачыкъланнганды. Аманлыкъчыланы кёбюсю иги кесек заманны  тёлемей борч этгенлери ючюн  кёк отлукъну хайырланмазча чек салыннганладыла.  Ол законодательствогъа бузукълукъ этгенден тышында, жашау журтха эм  къоншуларына да уллу къоркъуу салады, деп билдириледи  «Газпром межрегионгаз Нальчик»  биригиуню пресс-службасындан.

Алай бла газны урлагъанла Административ бузукъланы кодексини 7.19-чу статьясына тийишлиликде тазир тёлерикдиле. Аны ёлчеми энчи иелилеге - 10-15  минг сомгъа жетеди. Экинчи бузукълукъ этселе аманлыкъчыла, РФ-ни Уголовный кодексини 215.3-чю статьясына кёре, эки жылгъа тутулургъа да боллукъдула. Аны хатасындан адам ёлсе ол сегиз жылгъа жетеди. Урланнган кёк отлукъну ёлчеми  тинтилсе, бузукълукъчу РФ-ни Уголовный кодексини 158-чи статьясына тийишлиликде (Урлагъан) 100 минг сомдан артыкъ  тазир тёлерге неда алты жылгъа олтурургъа  тюшерикди. 

Андан сора да, кеси аллына кёк отлукъгъа къошулгъаны ачыкъланса, аны мычымай быргъысын кеседиле.  Алай бла кёк отлукъ бла жалчытхан биригиу бузукълукъ этилгенине акт жазады эм эсеплеген приборсуз къоратылгъан газны ёлчемин тийишли мардалагъа кёре санайды. Ол алты айны  ичинде къыш кезиуде хайырланылгъаныча  тергеледи.

Эркинликсиз къошулгъаннга быллай шартла саналадыла: эркинликсиз газ тартса, проектде болгъандан башха тюрлендирсе, кеси аллына  газ оборудование ремонт этсе, газ оборудование болгъан жерде  кеси аллына планировка бардырса, газ бла байламлы ишлени  аллай эркинлиги болмагъан адамгъа неда организациягъа  этдирсе.    

Эсге сала айтсакъ,  «Газпром межрегионгаз Нальчик» биригиу Къабарты-Малкъарда жашагъан инсанланы уллу кёллюлюк этмей,  эслирек болургъа, эркинликсиз газ ызгъа къошулмазгъа  чакъырады.  Аллай шартны эслеген адам,   созмай, диспетчер службагъа  104  телефон  номерге   сёлешип билдирирге борчлуду. Андан сора да,   контроль бардыргъан жер-жерли органлагъа айтыргъа боллукъду. Ол адамны жашауун сакъларгъа болушуругъун да белгилеп айтырчады.

Магометланы Сулейман.