Жюзден артыкъ сабий бла аланы ата-аналары жолда жюрюуню жорукъларын юйретиу жумушлагъа къатышхандыла.
Нальчикде Жолда жюрюуню жорукъларыны халкъла аралы кюнюне аталып, къууанчлы жумушла болгъандыла. Алагъа Жаш тёлюню ишлери, Жарыкъландырыу эм илму министерстволаны келечилери, къырал автоинспекторла да къатышхандыла.
Жаш тёлюню ишлери жаны бла министрни орунбасары Ахметланы Артур бла КъМР-де МВД-ны УГИБДД-сыны бёлюмюню таматасы полицияны майору Артур Каров жолда жорукъланы сакълауну магъаналылыгъын чертгендиле. Ала жыйылгъанланы сакъ болургъа, саулукълу жашау бардырыргъа чакъыргъандыла.
Автоинспекторла орамда жаяу адамла, водительле, машинаны ичинде болгъанла да кеслерин къалай жюрютюрге кереклисин ангылатхандыла. Энчи эс аякъ машинада бла самокатда учханда къоркъуусузлукъну жорукъларына бурулгъанды.
Тюбешиу ушакъ халда бардырылгъанды, сабийле полициячыланы сорууларына жууапла бергендиле, жолда тюбеген болумланы юслеринден айтхандыла. Ахырында алагъа байрам къуралгъанды.
Сабийле бла ата-анала полициячылагъа заманларын зауукълу ётдюргенлери эмда кёп сейир зат билгенлери ючюн ыразылыкъларын айтхандыла.
