Республиканы правительствосуну кезиулю кенгешинде регионну бюджетин толтуруу, инвестициялы башламчылыкъланы тамамлау, билим бериу, социал жумушланы тындырыу эм талай башха темала бла байламлы бир ненча проектге къаралгъанды. Жыйылыуну Правительствону Председатели Мусукланы Алий бардыргъанды.
Баш темаладан бири – республиканы бюджети быйылны биринчи жарымында къалай толтурулгъаны бла байламлы эди. Финансла министрни къуллугъун толтургъан Къалабекланы Азамат билдиргеннге кёре, бу кезиуде регионну бохчасына 31,4 миллиард сом тюшюп, аны бла план 50,5 процентге толгъанды. Озгъан жылны ол кезиую бла тенглешдиргенде уа, ёсюм тёрт процентге жетгенди.
Къоранчланы юсюнден айтханда, ала 31,3 миллиард сомдула неда пландан 46 процент. Ол санда 22,3 миллиардны республика кеси мажаргъанды, къалгъан кесеги уа федерал бюджетден жиберилгенди. Бу шартлагъа кёре, КъМР-ни бюджети быйылны биринчи жарымында 52 миллион сом профицит бла толтурулгъанды.
Къалабек улу белгилегенича, сагъынылгъан кезиуде бюджетге налогла бла эмда аладан тышында 10,5 миллиард сом тюшгенди; былтыргъы кезиу бла тенглешдиргенде – 111,6 процент. Ол кеси да чагъыр продукциягъа акцизлени санамай алай. Тюшюрген файдагъа, мюлкге, битеулю хайыргъа салыннган налогла эмда НДФЛ бла да асламыракъ ахча жыйылгъанды.
Проектледен бири бла келир жылгъа приватизация планны сюзюп, дурус кёргендиле. Жер эмда ырысхы бла байламлы халланы министри Аслан Тохов айтханнга кёре, сёз мында талай акцияланы юсюнден барады; аланы сатаргъа онг болса, бюджетге 53 миллион сом тюшерикди.
Министр дагъыда жангы инвестициялы проектни туура этгенди. Ол «Долина Нарзанов» санаторийни къатында энтта да 120 жерли жангы корпусну къурулушуду. Бу башламчылыкъ тамам этилсе, 130 жангы ишчи жер къураллыкъды.
КъМР-ни Правительствосу «РЖД-Здоровье» акционер биригиу бла келишимни дурус кёргенди. Къурулушну бардырырча анга Долинскде 3,6 гектар жер бёлюнюрюкдю. Саулай айтханда уа, проектни багъасы 1,8 миллиард сомдан аслам болады. Ол кеси да быйыл башланып, 2029 жылда тамам болургъа керекди. Анга къоратылгъан ахча алты жылны ичинде къайтырыкъды.
Промышленностьну айнытыугъа республиканы бюджетинден 15 миллион сом жиберирге оноулашхандыла. Промышленность, энергетика эм сатыу-алыу министрни къуллугъун толтургъан Эльдар Кяров айтханнга кёре, андан 10 миллион сом коммерциялы болмагъан «Къабарты-Малкъар Республиканы Гарантияла фонду» организациягъа жиберилликди, къалгъан кесеги уа промышленность предприятияланы жангы оборудование сатып алыргъа этген къоранчларын жабаргъа бёлюнюрюкдю.
«КъМР-ни туризм-рекреация комплексин айнытыу» къырал программаны паспортуна эмда республиканы Курортла эм туризм министерствосуну ишин жалчытыу сферагъа тюрлениуле кийирилликдиле. Министерствону башчысы Аскер Бифов айтханнга кёре, бюджетден анга жети миллион сом къоратыллыкъды. Ол дагъыда анда коллегияны къауумунда тюрлениуле боллугъун туура этгенди.
Правительство КъМР-де правогъа бузукълукъла этиуню профилактикасын тамамлау жаны бла ведомствола аралы комиссияны къауумунда тюрлениулени, билим бериуню айнытыу жаны бла талай оноуну эмда муниципалитетледе жол фондлагъа субсидияла бериуню дурус кёргенди.
Улбашланы Мурат.
