Кёп болмай, Къабарты-Малкъарны медицина организацияларыны таматалары къатышып, КъМР-ни Саулукъ сакълау министерствосуну ишчи кенгеши болгъанды. Ол республикада саулукъ сакълауну айнытыугъа эм башха магъаналы соруулагъа жораланнганды. 

Анга КъМР-ни саулукъ сакълау министрини орунбасарлары Иттийланы Лариса бла Борис Хашхожев, медицина жаны бла билим бериу эм кадрла бёлюмню таматасы   Рузана Ордокова, жукъгъан ауруула бла байламлы штатда болмагъан баш специалист Ирина Кимова эм жамауатны саулугъу, медицина профилактика, аналитика эм  информация технологияла жаны бла араны (ЦОЗМАИТ) таматасыны къуллугъун толтургъан  Диана Беркетова эм башхала къатышхандыла.
Тюбешиуде  энчи аскер операциягъа къатышханлагъа бла  ветеранлагъа  заманында эм тийишли халда медицина болушлукъ бериуню  онглары  сюзюлгендиле. Андан сора да, сакъатлагъа энчи программалагъа кёре  реабилитация, абилитация бардырыуну игилендирирге эм аны бла байламлы тынгылы  отчёт этерге керек болгъаны да къаты айтылгъанды. 
Дагъыда  гепатитге къажау туруугъа да энчи эс бурулгъанды. Бу жаны бла диагностика магъаналы жерни алады. Ауруу башлана тургъан кезиуюнде ачыкъланса, жангы амалланы хайыры бла  анга жетишимли багъаргъа боллукъду. 
Жыйылыугъа къатышханла  регионну "Медицина кадрла" паспорту бла да  шагъырейленнгендиле. Ол санда кадрла бла жалчытыугъа энчи  эс бурулгъанды. Аны кезиуюнде "Земский доктор" эм "Земский фельдшер" программала къалай бардырылгъанларына,  башха соруулагъа да къаралгъанды. 

Магометланы Сулейман 
хазырлагъанды.