Ди республикэм и къалащхьэ Налшык ныбжьыщIэхэм я узыншагъэр щызэфIагъэувэжу дэт «Нэмыс» IуэхущIапIэм иджыблагъэ зэIущIэ хьэлэмэт щекIуэкIащ. Ар къызэрагъэпэщат КъБР-м ЩIыналъэм Iуэхухэр щызегъэкIуэнымкIэ и центрым (ЦУР), республикэм Сабийм и хуитыныгъэхэр хъумэнымкIэ уполномоченнэ Бэдракъ Iэминэрэ «Зодчий» архитектурэмкIэ сабий школымрэ и гъусэу.
- Сабиигъуэр цIыхум и дежкIэ мыхьэнэшхуэ зиIэ зэманщ, сыту жыпIэмэ а лъэхъэнэращ и къэкIуэнум лъабжьэ хуэхъунур абы щигъэтIылъыр, - Iуэхугъуэм тепсэлъыхьу жеIэ ЦУР-м и унафэщI КIэдыкIуей Мадинэ. - Дэтхэнэ сабийри хуэныкъуэщ IэфIагъ, гуапагъ, хуабагъ, лъагъуныгъэ, къыщалъхуа щIыпIэмрэ къыщыхъумрэ емылъытауэ. Дэ, балигъхэм, ди къалэнщ ди сабий псори зыхуей хуэдгъэзэну, набдзэгубдзаплъэу дахущытыну, ахэр фIыуэ зэрытлъагъур гурэ псэкIэ зыхедгъэщIэну. Дызыхэт Iуэхугъуэри аращ зыхуэгъэпсар: сабийхэм я гукъыдэжыр къэтIэтыну, я гум дэрэжэгъуэ къыщыдгъэушыну, яхудиIэ гурыщIэ къабзэр зыхедгъэщIэну.
ИпэжыпIэкIэ, апхуэдэу къызэгъэпэща хъуат махуэщIыр. АрхитектурэмкIэ сабий еджапIэм и IэщIагъэлIхэм ныбжьыщIэхэр ирагъэсащ унэхэм, къалэхэм я проектхэр ящIыфу. Архитектор ныбжьыщIэу зызылъытэжа сабийхэм я лэжьыгъэхэр хьэлэмэт защIэт. Абыхэм щыплъагъурт ахэр зыщIэхъуэпс псэупIэ унэхэм, щыджэгуну уэрамхэм я сурэт гъэщIэгъуэнхэр.
- «Нэмыс» сабий центрым и гъэсэнхэр кIэлъыдгъэплъащ проект лэжьыгъэ зэмылIэужьыгъуэхэр зэрытщIым. ИужькIэ псоми зэгъусэу «духуащ» унэ екIухэмкIэ зэхэт къалэшхуэр, зыгъэпсэхупIэхэр, нэгузегъэужьыпIэхэр, еджапIэ зэмылIэужьыгъуэхэр и куэду, - жеIэ «Зодчий» сабий школым и унафэщI Ксанаевэ Валерие. - Длэжьам сабийхэми балигъхэми гукъыдэжышхуэ къыдитащ. ЦIыкIухэм я нэгу зэIухахэр, насып къызыщIих нэхэр плъагъуну куэд и уасэт.
Апхуэдэу ЦУР-м и IэщIагъэлIхэм ныбжьыщIэхэр хуагъэсащ видеороликхэр трахыфу, я лэжьыгъэхэр хъыбархэр щызэбгрыкI Интернетым иралъхьэрэ ягъэлъэгъуэфу. А псоми гукъыдэж къезыта ныбжьыщIэхэм папщIэ джэгукIэ зэмылIэужьыгъуэхэр ягъэлъэгъуащ, зэпеуэхэр къызэрагъэпэщащ, уэрэдхэмрэ къафэхэмрэ ягъэзэщIащ.
ЗэIущIэм и кIэухыу, абы хэта дэтхэнэ ныбжьыщIэми IэфIыкIэхэр зэрылъ хъуржын цIыкIухэр, саугъэт хьэлэмэтхэр тыгъэ хуащIащ. Шэч хэлъкъым а махуэр сабийхэм гукъинэж IэфIу куэдрэ къазэрыдекIуэкIынум. «Нэмысым» и гъэсэнхэм насып яхуэзыгуэшахэми я псапэр куэд ухъу. Апхуэдэхэм я Iуэху зехьэкIэр нэгъуэщIхэми щапхъэфI яхурехъу!
Тамбий Линэ.
