Быйыл Къабарты-Малкъарда 13 кёпюр жангыртыллыкъды, саулай алып айтханда, тийишли ишле  644 метр чакълы бирде бардырыллыкъдыла. Бюгюнлюкде  объектлени барында да  къыстау ишле барадыла. Бир къауумунда   мурдорлары  бла аркъауларын салып кюрешедиле, къалгъанларында да башха жумушланы тамамлайдыла. Жууукъ заманда кёпюрледен бешиси хайырланыргъа берилликди, деп билдириледи КъМР-ни Транспорт эмда жол мюлк министерствосуну пресс-службасындан.

  Бусагъатда  «Экинчи Чегем — Булунгу» жолда беш кёпюр салыннганды, дагъыда Чегем, Кёк-Таш эм Жуунгу-сууда да  тёртюсюню  къурулушу барады. Проектге кёре, Чегем тарында  214 метрде 9 кёпюр жангыртыллыкъды.

Аны бла бирге Шимал-Осетия бла чекде «Майский — Урожайное» жолда Терк  сууну бойнунда узунлугъу 162 метрге жетген деу кёпюрню салып кюрешедиле. Бусагъатда специалистле аны  чигинжилерин  кючлейдиле эм башха жумушланы да этедиле. 

Къурулуш ишле болжалдан кеч къалмай барадыла, анга кёре жууукъ замнда  объектлеге жолгъа бла бирге  асфальт жайылырча боллукъдула. Алада къоркъуусузлукъ жалчытылынырча да аслам эс буруллукъду.

Магометланы Сулейман.