Кёп болмай «Россети Северный Кавказ» - «Каббалкэнерго» биригиуню таматасы Резуан Загаштоковну башчылыгъы бла баланс комиссияны кенгеши болгъанды. Анда быйыл биринчи кварталда токну къоранчы бла байламлы болум иги жанына тюрленнгени да белгиленнгенди. Анга уа тийишли мадарла себеплик этгендиле.
Сагъынылгъан кезиуде энергетикле токну тас болгъаны 19,28 процентге тюшгенди. Ол планда белгиленнгенден эсе 0,87 процентге азды эм былтырдан 0,79 процентге асламды. Алай бла 37,6 миллион киловатт-сагъатны сакъларгъа къолдан келгенди. Ол а 37 минг адам жашагъан Май районнга алты айгъа жетерчады.
Тюбешиуде чыгъарылгъан эсеплеге кёре эм иги кёрюмдюлеге Прохладна бла Элбрус муниципал районла жетгендиле. Аны баш амалларындан бирлери – абонентле бла ангылатыу ишни тири бардырылгъаныды эм эски счётчикле жангыларына алышындырылгъаныды.
Жашау журтланы иелери жангы эсеплеген приборланы къыйматлылыкъларын къысха заманда сезгендиле. Аны бла бирге ток бла жалчытхан компанияны келечилерине да аланы терк-терк жокъларгъа керек тюйюлдю. Жангы приборла орамдагъы чыпынлада къол жетмезча орнатыладыла. Абонентлени хар бирине да энчи пульт берилгенди. Аны бла ай, кюн эм сутка сайын токну къаллай бир къорагъаны билдириледи.
Бир тюрлю бузукълукъ чыкъса, тийишли ведомство тюзюнлей аланы кетерирча мадар этеди. Токну урлау да терк окъуна биригиуге билинеди. Аллай бузукълукъ ачыкъланса, этилген къоранчны ёлчеми тинтиледи, экинчи кере этилсе уа, РФ-ни Административ бузукъланы кодексини 7.19-чу статьясына тийишлиликде (кеси аллына ток ызлагъа къошулгъаны неда эсеплеген прибору болмагъаны ючюн) жууапха тартыллыкъды. Анга кёре инсанла – 10-15, къуллукъчула – 30-80 эм организацияла 100-200 минг сом тазир тёлерикдиле. Экинчи кере бузукълукъ этгенлеге тазирни ёлчеми иги да уллу боллукъду. Бир-бир кезиуде уа алагъа уголовный иш ачылыргъа къоркъуу барды.
Эсге сала айтсакъ, абонентни бла энергокюч биригиуню араларында даулаш чыкъса, дагъыда ток ызлагъа тийишли халда къошулур ючюн, «Россети Северный Кавказ»-«Каббалкэнерго» биригиуню бу телефон номери бла «къызыу ызына» сёлешип билдирирге боллукъду: 8-800-220-0-220.
Энергокюч бла жалчытхан биригиуден билдиргенлерича, мындан арысында да ток тас болмазына къаты контроль этилликди эм хайырланыучула бла ангылатыу иш бардырыллыкъды.
Магометланы Сулейман.
