Росмолодёжь.Форумы платформаны «Машук» Жаш тёлюню Битеуроссей 16-чы форумунда Шимал-Кавказ федерал округну тёрели кюню бардырылгъанды. 
Ол кюнню ичинде машукчулагъа аслам сейир альтернатив майданла ачылып эдиле. Алай бла, Ставрополь крайны чатырында ала кокошникле бла байламлы мастер-классха къатышхандыла.
Ингирни бек ариу кесеклеринден бири уа баш сахнада уллу концерт болгъаныды. Сахнада кавказ регионланы келечилери форумгъа къатышханлагъа СКФО-ну энчиликлерин кёргюзталгъандыла. Программаны Ставропольну вокал-хореография ансамбли ачханды, ол бир ненча орус халкъ жырны эшитдиргенди.
Ингуш эм орус тилледе жырла бла Ингушетия Республикадан къауум сейирсиндиргенди. Регионну келечилери сахнада къараучуланы кёллерине жетген асламлы тепсеуню кёргюзтгендиле.
Къабарты-Малкъар Республиканы атындан форумну баш сахнасына ёз жерлерини юсюнден жырны айтып вокал коллектив чыкъгъанды, ол жырны ала бла бирге саулайда Комсомол тала жырлагъанды, жаш артистлени тепсеу къаууму да къараучуланы къызыу къарсларына тийишли болгъанды.
Къарачай-Черкес а машукчуланы тау жерлени ариулукъларыны юсюнден жыры бла къууандыргъанды, аламат тепсеулери уа форумгъа къатышханланы жюреклерин учундургъандыла. Осетин халкъ жырны сёзлери уа къараучуланы кюнлю республиканы жылыууна чулгъагъанча эди. Субай дюгер къызланы бла ёхтем жигитлени тепсеулери да къууанч сезимле саугъалагъандыла.
Форумну баш сахнасына Чечен Республикадан эр кишилени вокал ансамбли да чыкъгъанды, ала Кавказны юсюнден жырларын эшитдиргендиле. Ала жырлагъан кезиуде талада гюрен тургъан форумгъа къатышхан жашла бла къызла лезгинкада аякъ бюкгендиле.
«Машук» форум Россейни жаш тёлюсю миллетле аралы келишиулюкню кючлеген, оюмларын бир бирлерине билдирген эмда къыралны тамблагъы кюнюн къурагъан энчи майданны даражасын биягъы бегитгенди. Бу байрам, Шимал Кавказны маданият байлыгъын кёргюзтгенден сора да, кёп миллетли эмда кёп конфессиялы Россейни бирлигин кючлеуде магъаналы атламды.