КъМР-ни табийгъат байлыкъла эм экология министри Шауаланы Илияс ишчи жумуш бла Элбрус районнга баргъанды. Аны юсюнден республиканы правительствосуну сайты билдиреди.
Элбрус районну администрациясыны башчысы Отарланы Мухтар, Тырныауузну администрациясыны таматасы Афашокъаланы Азамат, Къабарты-Малкъар Республикада Табийгъат байлыкълары болгъан жерледе къурулуш ишлени тынгылы бардыргъан къырал биригиуню оноучусу Хасанби Ахохов, Элбрус районну жоллагъа къарагъан управлениясыны таматасы Ахматланы Мурадин эм «Партнёр» подряд биригиуню келечиси Айвар Межгихов бла ырхы келген жерледе ишлени бардырыу жаны бла тынгылы инспекция этилгенди.
Артыкъ уллу эс Гирхожан-Суу баргъан жерде ырхы келген илипинни тёгерегин кючлеу бла эм суу баргъан жерлени тюзетиуге бурулгъанды.
Гирхожан-Суу юсюнде орналгъан федерал кёпюрге ремонтну этерча, аны тёгерегин тынгылы бегитирге кереклисини юсюнден да сёлешиннгенди.
Ишчи тюбешиуню кезиуюнде адамланы къоркъуусузлукъларын жалчытыу бла байламлы мычымай этиллик ишле сюзюлгендиле эмда табийгъат къыйынлыкълагъа къажау тутхучлу амалланы къураргъа кереклиси айтылгъанды, деп жазылады билдириуде.
