2025 гъэм и мазиблым къриубыдэу Налшык къалэм и аэропортым цIыху 102031-рэ щызэблэкIащ. Нэгъабэ и щIы­шылэм - бадзэуэгъуэм щыIа бжыгъэхэм нэхърэ проценти 10-кIэ нэхъыбэщ ар. 

Къапщытэж пIалъэм къриубыдэу ди аэропортым зыщаIэтащ е къыщетIысэ- хащ псори зэхэту кхъухьлъатэ 634-рэ, ари процент 16-кIэ нэхъыбэщ, нэгъабэрей ­бжыгъэхэм елъытауэ. А псор яхузэфIэкIащ пассажирхэм я терминалхэр иджырей мардэм зэрыхуагъэкIуам, цIыхухэр я ­рейсхэм пэплъэу зыщIэс пэшхэр нэхъ ин зэращIам, гъуэгугъэлъагъуэхэр къызэрыхагъэбелджылыкIам, цIыхухэм я хьэпшып­хэр къэпщытэным трагъэкIуадэ зэманыр нэхъ мащIэ зэрыхъуам, ныкъуэдыкъуэхэм зекIуапIэ щхьэхуэхэр зэрыхухахам я ­фIыгъэкIэ. 
Апхуэдэуи мыхьэнэ иIэщ маршрутхэм я куэдагъым къызэрыхагъэхъуам. Кхъухь­лъатэхэр иджыпсту Мэзкуу къалэм махуэ къэс мэлъатэ (Шереметьевэ, Внуковэ аэропортхэм щетIысэхыу). Сочэрэ Къэзан­рэ къалэхэм кIуэ рейсхэм я билет уасэм субсидиемкIэ щыIэ къэрал программэм ипкъ иткIэ хукIэрагъэху, абы и фIыгъэкIи, зэпэубыда хъуркъым. Билет уасэм и Iыхьэ ныкъуэр субсидие зэращI ахъшэр къэрал, щIыналъэ бюджетхэм къахокI. 
Мурад щыIэщ дызыхуэкIуэ илъэсхэм ­кхъухьлъатэхэр къыщытIыс, абыхэм зыщаIэт гъуэгур ирагъэфIэкIуэну, кхъухьлъатэ нэхъ хьэлъэхэр къыщытIысыфын, дунейм и щытыкIэри зэран яхуэмыхъуфын, маршрутхэм къыхагъэхъуэфын, цIыху нэхъыби щызэблэкIыфын хуэдэу. 

ХЬЭЩЫКЪУЕЙ  Олег.