«Яникой-1961» деген футбол къауумну жетишимлерини юслеринден билдире туруучубуз. Кертиси бла да, элли сабийлени бла жаш тёлюню бирикдирип, орамлада айланмазча этип, сюйген затлары бла кюреширча онгла къуралыпдыла. Команданы баш тренери Малкъондуланы Мунир а арт эки-юч жылда жашауун толусунлай бу ишине жоралагъанды дерге боллукъду.
Айны башында уа баш тренер команданы гитче къаууму бла Грозныйде «Ахмат-Аренада» болуп, яникойчуланы юслеринден къыралыбызны ара телеканалларында айтырча этгенди. Ол эсде къалгъан жумушну юсюнденди ушагъыбыз.
- Мунир, сабийлени къууандыргъан, эслеринде сакъланырыкъ жолоучулукъну къалай болдургъанса? Кертисин айтханда, мен эллерибизден футболчула угъай да, республикалы клубланы келечилери окъуна премьер-лиганы майданларына чыгъып билмейме...
- Экинчи августда Грозный шахарда Россейни премьер-лигасыны 3-чю кезиую бола эди. «Ахмат-Аренада» «Пари Нижний Новгород» бла «Локомотив» тюбеше эдиле. Мен Нижний Новгородну командасыны генеральный директору Давид Мелик-Гусейнов бла шуёхлукъ жюрютгеним себепли, ушакъларыбызны биринде ол: «Кел, сени сабийлеринги чыгъарайыкъ футбол майданнга» - дейди. Анга бек къууанама.
Жолгъа хазырланып башлайбыз. Ата-анала да билеклик этедиле. 24 сабий кесибизден, сора Тёбен Чегемни «Шаудан» командасындан 6 абаданыракъ футболчуну алабыз да, жолгъа тебирейбиз. «Шауданны» футболчулары да аллай даражалы оюнда болуп, андагъы халны сезселе сюе эдим, нек дегенде бу къауум да футболгъа бек берилипди. Эл таматалары да уллу магъана береди жаш тёлюню орамладан тыйып, футбол бла кюрешдириуге.
- Сабийле россейли футболчуланы уа иги таныймыдыла? Шёндюгюле Роналдо, Месси, Озил дегенчаланы бегирек билген сунама...
- Биледиле кесибизникилени да. Жолда бара мен аны бла турлукъма деп, кимле бла сюелирге сюйгенлерин айта эдиле. Сора оюн башланыргъа футболчула, быланы къолларындан тутуп, майданнга чыгъаргъа дегенде, алагъа къарап, магъаналы жумушха къатышханларына къууана эдиле.
Сора «Ахмат-Аренача» уллу стадионда футболгъа къарау болмагъанча сейир сезимле туудурмай болмайды. Профессионалланы ойнагъанларын кёрюу да бек аламатды.
- Оюн тюзюнлей эфирде бара болур эди?
- Хау. Стадиондагъы диктор да, МАТЧ каналны бардыргъан да битеу къыралгъа эшитдирип, «Яникой-1961» команданы юсюнден айтхандыла. Аны къалай бла къуралгъанын, бюгюнлюкде не ишлегенини юсюнден да... Мен оюм этгенден, быллай жолоучулукъла бла оюнла кёллендиредиле хорламлагъа бла жетишимлеге.
- Бюгюн сен юч къауумну юйретесе. Таматала бла Къабарты-Малкъарны биринчи дивизионунда ойнайсыз. Команда бла байламлы сен тюрлендирирге сюйген затла бармыдыла?
- Командагъа ахча болушлукъ бек керек болады. Алгъаракълада энчи счёт да ачхан эдик. Болушханла да бардыла.
Сора бир-бир ойнаучулада низамлыкъ жетмейди. Оюннга кеч къалып келгенле да боладыла. Битеу ол затла уа тюбешиулени эсеплерине заран боладыла. Алгъаракъда эки тюбешиуде бу мен айтхан кемчиликле ючюн къытдыргъанбыз. Хар нени да башы низам, жарау этиу болгъанын ангылау бек магъаналыды.
Ушакъны
Таппасханланы Аминат бардыргъанды.
