Къабарты-Малкъарны айнытыу корпорацияны башчысы Залим Кайсинов, «Эпсилон» предприятияны таматасы Герийланы Халим бла бирге кёп болмай Беларусь Республикада болгъандыла. Ала Минск шахарда «МЭТЗ им. В.И. Козлова» акционер биригиуню таматалары бла тюбешип, бирге ишлеуню юсюнден сёлешгендиле, деп билдиргендиле КъМР-ни Экономиканы айнытыу министерствосундан.
Ол завод электротехника керекле чыгъарады. Ол санда: трансформаторла, тюрлю-тюрлю аппаратла, электрокюч станцияла, автоматика установкала. Тюбешиуню кезиуюнде эки жаны да Къабарты-Малкъарда быллай затланы чыгъарыу жаны бла байламлыкъла къураргъа эмда сатыуну кенгертирге оноулашхандыла. Ол умутда Нальчикде аладан (трансформатор подстанцияла) къыстырыкъ жыйгъан жер къураргъа да келишгендиле.
Дагъыда бу заводха керек бир-бир затланы (изоляторла) «Эпсилон» предприятияда чыгъарыргъа боллугъуну сагъышын да этгендиле. Аланы къаллай тюрлюлери изленнгенин «МЭТЗ» билдирликди эмда техника документациясын да кёргюзтюрюкдю.
Бу тюбешиу эки жанына да магъаналы болгъанын чертгендиле министерствода. Ол арада промышленность эмда экономика байламлыкъланы кючлендирликди, шёндюгю электротехника продукция Къабарты-Малкъарда асламыракъ болурча да этерикди.
Улбашланы Мурат
