«Агро-2025» фIэщыгъэр зэрихьэу Мэзкуу къалэм и «Тимирязев Центр» егъэджэныгъэ-гъэлъэгъуэныгъэ комплексым иджыблагъэ щекIуэкIа урысейпсо гуфIэгъуэ пшыхьым, еджапIэр къызэраухам и щIыхькIэ зэхашам, хэтащ Къэбэрдей-Балъкъэр къэрал мэкъумэш университетым мы гъэм къыщIигъэкIа, диплом плъыжьхэмкIэ ар къэзыухахэм я нэхъыфIих. 

КъБР-м и щIыхьыр абы щаIэтыну апхуэдэ пщIэ ягъуэтащ КъБКъМУ-м и факультет зэхуэмыдэхэм щеджа ДыщэкI Iэминэ, Гыззыев Iэдэм, Желтоноговэ Ксение, Мусукаев Магомед, КIуэкIуэ Темырлан, Соблыр Ахьмэд сымэ. 
«Фэ фыкъыхохьэ къэралым и экономикэм технологие ехьэжьахэр щыкуэд и IэнатIэм. Шэч къытесхьэркъым, фэ фщыщ дэтхэнэ зыми АПК-м щIэ гуэрхэр зэрыхилъхьэнум. Дэ абы икъукIэ дыпоплъэ. «КъэкIуэнур - ар фэращ!» къыхуеджэныгъэм щIэту йокIуэкI нобэрей пшыхьыр. Сыт щхьэкIэ жыпIэмэ, пэжри аращ, щIалэгъуалэр - ар ди къэкIуэнырщ. Сынывэхъуэхъуну сыхуейщ фи балигъ гъащIэр фи диплом плъыжьхэм хуэдэу зэщIэ­блэрэ купщIафIэу щытыну», - захуигъэзащ хьэщIэхэм УФ-м мэкъумэш хозяйствэмкIэ и министр Лут Оксанэ. 
Апхуэдэуи абы зэрыжиIамкIэ, къэралым и мэкъумэш еджапIэ нэхъыщхьэхэр къэзыуххэм я урысейпсо гуфIэгъуэ пшыхьыр дяпэкIэ илъэс къэс ирагъэ­кIуэкIынущ. 

НАУРЫЗОКЪУЭ  Ислъам.