Газыр здынэмыса унэхэм ар яхуешэлIэным ехьэлIауэ щыIэ программэр Къэбэрдей-Балъкъэрым щолажьэ 2021 гъэм щегъэжьауэ. Абы лъандэрэ унагъуэ 3900-м газыр я псэупIэхэм хурашэ­лIащ икIи абыхэм ящыщу унагъуэ 2800-м ар къагъэсэбэп. Къыхэгъэщыпхъэщ мы программэр гъэ­зэ­щIэнымкIэ Къэбэрдей-Балъкъэрыр къэралым щыпэрыт щIыналъэхэм зэращыщыр.

Газыр здынэмыса унэхэм ар хурашэлIэн папщIэ къэралым и щIыналъэ 55-м сом зы мелард хуаутIыпщынущ. ­Льготэ зиIэхэм программэм хиубыдэу субсидиеу сом мини 100 зырыз иратынущ, газым пыщIа Iэмэпсымэхэр къращэхуну, бжьамийхэм ирыпадзэну, н.къ. папщIэ.
Апхуэдэ дэIэпыкъуныгъэ зратынухэм хеубыдэ унагъуэ бы­ныфIэхэр, хуэмыщIауэ псэухэр, дзэ Iуэху хэхам хэтхэр, СВО-м и ветеранхэр, абыхэм я унагъуэхэр, ны­къуэдыкъуагъэкIэ 1-нэ гупым хыхьэхэр, сабий ныкъуэды­къуэхэр зезыхьэхэр, Хэку ­зауэшхуэм и ветеранхэр.
Фигу къэдгъэкIыжынщи, газыр здынэмыса псэупIэхэм ар яхуешэлIэным ехьэлIауэ щыIэ программэм ипкъ иткIэ льготэ зиIэхэм газ оборудованэхэр къызэращэхуамрэ я псэупIэхэм газыр ешэлIэным трагъэкIуэдамрэ субсидиеу иратыж 2023 гъэм къыщы­щIэдзауэ. Абы нэмыщI, программэм цIыхухэм Iэмал ярет а гъэсыныпхъэмкIэ къызэгъэпэща къуажэхэм е дачэ щIы­пIэхэм щIэуэ щаухуа унэхэм я бжэIупэхэм нэс ар пщIэншэу хуашэну.

ХЬЭЩЫКЪУЕЙ Олег.