Алгъаракълада билдиргенибизча, Къабарты-Малкъарны тауларында квадроцикллада «Кавказ – тенгизден тенгизге дери» жолоучулукъ бардырылгъанды, ол битеу да сегиз регионну бирикдиргенди.
Жолоучула республиканы битеу ауузлары, бийик-тау ауушлары бла ётгендиле. Кюн бузулгъанына, экспедицияны кезиуюнде къыйын болум да чыкъгъанына къарамай, анга къатышханла бийик усталыкълы, сынамлы адамла болгъанларыны, Нальчикден внедорожникледе барыргъа сюйгенлени биригиулерини жанындан себеплик этилгенини хайырындан салыннган борчла барысы да толтурулгъандыла. Ала Ара Кавказны Бызынгыдан Элбрусха дери кесегин баргъандыла, ахыр кюнюнде уа эм сейир, ариу да жолну – Элбрусну къыбыла этеклеринден шимал жанына – ётгендиле. Джаурген бла Шаукам ауушла, вольфрам-магъадан комбинатны тийреси бла жол да эсде къалырча болгъанды. Ингирде, кюн бата, Минги тауда жыйылгъанларында уа, табийгъат бютюн тамаша кёрюннгенди. 
Экспедицияны башха муратлары да болгъанды – машиналаны качестволарын тинтиу эмда краеведение. Аланы жарашдыргъан заводну ишчилери, бийик тау жоллада баргъандан сора, квадроциклланы двигательлерини, приводларыны халларына къарагъандыла, къаллай бир отлукъ къоратылгъанын тергегендиле, машиналагъа алгъаракълада алыннган жангы кереклени качестволарын да кёргендиле. СКФО-ну энчиликлерине тюшюне, экспертле машиналаны ишлеуде аланы эсге аллыкъдыла. Жолочулукъну краеведение магъанасыны юсюнден айтханда уа, анга къатышханла дагъыда Чеченде, Дагъыстанда, Ингушетияда, Шимал Осетияда болгъандыла, энди Къарачай-Черкесге, Адыгеягъа бла Краснодар крайгъа барлыкъдыла.  
Жолоучулукъну «Веломоторс» компания, внедорожникледе «Россейни хазнасы» краеведение проектни толтуруугъа къатышханла бла Орус география обществону регионда жаш тёлю арасы къурагъандыла.
Кульчаланы Зульфия.